Pas më shumë se 24 orë, fusha e grumbullimit të mbetjeve pranë Inceneratorit të Elbasanit, është përfshirë nga flakët, duke krijuar ndotje masive në Elbasan dhe zonat përreth.
Kreu i Shqipëria Bëhet Adriatik Lapaj, ka ngritur alarmin për ndotjen masive që ka shkaktuar zjarri në fushën e mbetjeve.
Lapaj në një video në Facebook, deklaron se zjarri nuk ka shkaktuar ndotje vetëm në Elbasan. Sipas tij, zona përreth fushës së mbetjeve, është zonë bujqësore dhe blegtoriale dhe produktet që vijnë nga rrethinat e Elbasanit, janë të spërkatura me tymin e fushës së mbetjeve.
“Sot jemi në Elbasan. Kjo këtu është pasaporta europiane e Shqipërisë sot! Inceneratori i Elbasnait për të cilin janë paguar 26 mln euro dhe që do të duhet të garantonte cilësinë e mjedisit në gjithë qarkun e Elbasanit, shkakton sot në Elbasan ndotje masive!
Shkakton ndotje jo vetëm për qytetarët e Elbasanit, por edhe për ju që na ndiqni, pasi zonat përreth janë zona bujqësore dhe blegtorale dhe produktet që vijnë nga këto zona, janë të spërkatura me tymin e fushës së mbetjeve të parave të korrupsionit, me të cilat vjedhin dhe mbajnë peng pushtetin politika aktuale në Shqipëri”, tha Lapaj pranë pikës së grumbullimit të mbetjeve në Elbasan.
