Presidenti francez, Emmanuel Macron i bëri thirrje presidentit rus, Vladimir Putin të pranojë armëpushimin në Ukrainë sa më shpejt të jetë e mundur. Dy presidentët folën për mbi dy orë për Iranin dhe Ukrainën, telefonata e parë që prej fillimit të agresionit rus.
“Macron dhe Putini trajtuan në thelb çështjet më të rëndësishme të situatës ndërkombëtare, Iranin dhe Ukrainën”, tha Pallati Elisee.
“Macron nënvizoi mbështetjen e palëkundur të Francës për sovranitetin dhe integritetin territorial të Ukrainës dhe bëri thirrje për vendosjen, sa më shpejt të jetë e mundur, të një armëpushimi dhe nisjen e negociatave midis Ukrainës dhe Rusisë për një zgjidhje të fortë dhe të qëndrueshme të konfliktit”, deklaroi Pallati Elisee.
Për Iranin, “Macron i kujtoi homologut përgjegjësitë e anëtarëve të përhershëm të Këshillit të Sigurimit të OKB-së, për çështjen bërthamore dhe këmbënguli në urgjencën që Irani të përmbushë detyrimet e Traktatit për Mospërhapjen e Armëve Bërthamore, dhe të lejojë inspektorët të rifillojnë menjëherë punën”, shtoi Elisee.
Ndërkohë, Putin paralajmëroi Macronin se çdo marrëveshje paqeje në Ukrainë duhet të jetë afatgjatë.
”Për Vladimir Putinin, konflikti ukrainas është pasojë e drejtpërdrejtë e politikave të shteteve perëndimore”, sipas Kremlinit.
