Ish-mbrojtësi i Barcelonës dhe i përfaqësueses spanjolle, Gerard Piqué, edhe pasi është tërhequr nga futbolli, vazhdon të jetë një personazh mediatik që bën bujë, qoftë në botën e sportit, biznesit apo jetës private.
Me një karrierë të lavdishme që përfshin katër Champions League, një Kupë Bote dhe një Europian, Piqué është shndërruar në sipërmarrës të suksesshëm përmes kompanisë Kosmos dhe krijues i Kings League, një kampionat alternativ futbolli i ndjekur nga miliona fansa në platformat Twitch, YouTube dhe TikTok.
Së fundmi, 36-vjeçari katalanas ka bërë sërish zhurmë përmes një deklarate të çuditshme, duke u rikthyer te fotografia e famshme e vitit 2010, ku ai shfaqej në një moment të afërt me Zlatan Ibrahimovic, ish-shok skuadre te Barcelona.
Në një transmetim të drejtpërdrejtë në emisionin “After Kings” me pjesëmarrjen e Ibai Llanos, Piqué sqaroi kontekstin e asaj fotoje që kishte ndezur spekulimet në mediat rozë, sidomos për shkak të lidhjes së tij të sapo nisur me këngëtaren kolumbiane Shakira.
“Në atë foto ndodhemi në parkingun e klubit. Ishte makina ime aty, dhe e gjithë shtypi përreth. Po të doja ta puthja Ibrahimovic-in, s’do ta bëja në parking para të gjithëve! Fotoja është totalisht jashtë kontekstit,” shpjegoi Piqué duke qeshur.
Ai kujtoi gjithashtu edhe reagimin e ashpër të Ibrahimovic ndaj thashethemeve: “Ditën tjetër, Zlatan po largohej nga Ciudad Deportiva dhe jashtë e prisnin gazetarët e emisioneve rozë, përfshirë edhe Telecinco. Një gazetar i afrohet dhe e pyet për situatën. Zlatan e ul xhamin dhe i thotë: ‘Eja në shtëpinë time me motrën tënde dhe do të të tregoj që nuk jam gay.”
