Palestinezët në Gazën veriore raportuan një nga netët më të këqija të bombardimeve izraelite në javët e fundit, pasi ushtria lëshoi urdhra evakuimi masiv të hënën, ndërsa zyrtarët izraelitë pritej të shkonin në Uashington për një nismë të re armëpushumi nga administrata Trump.
Një ditë pasi Presidenti i SHBA-së, Donald Trump, kërkoi t’i jepet fund luftës 20-mujore, një person i besueshëm i Kryeministrit Benjamin Netanyahu pritej në Shtëpinë e Bardhë për bisedime mbi një armëpushim në Gaza, Iranin dhe marrëveshje të mundshme më të gjera diplomatike rajonale.
“Shpërthimet nuk u ndalën kurrë; ata bombarduan shkolla dhe shtëpi. Ndiheshin si tërmete”, tha Salah, 60 vjeç, baba i pesë fëmijëve, nga Qyteti i Gazës. “Në lajme dëgjojmë se një armëpushim është afër, në terren shohim vdekje dhe dëgjojmë shpërthime.”
Tanket izraelite hynë në zonat lindore të periferisë Zeitoun në qytetin e Gazës dhe bombarduan disa zona në veri, ndërsa avionët bombarduan të paktën katër shkolla, pasi urdhëruan qindra familje që ishin strehuar brenda të largoheshin, thanë banorët.
Të paktën 25 persona u vranë në sulmet izraelite të hënën, thanë autoritetet shëndetësore, përfshirë 10 persona të vrarë në Zeitoun.
Ushtria izraelite tha se goditi objektiva militante në Gazën veriore, duke përfshirë qendrat e komandës dhe kontrollit, pasi ndërmori hapa për të zbutur rrezikun e dëmtimit të civilëve.
Bombardimi i rëndë pasoi urdhrat e rinj për evakuim në zona të gjera në veri, ku forcat izraelite kishin vepruar më parë dhe kishin lënë pas shkatërrime në shkallë të gjerë. Ushtria urdhëroi njerëzit atje të shkonin në jug, duke thënë se planifikonte të luftonte militantët e Hamasit që vepronin në Gazën veriore, përfshirë edhe në zemër të Qytetit të Gazës.
Më vonë të hënën, zyrtarët shëndetësorë në Spitalin Nasser në Khan Younis thanë se të paktën 13 persona ishin vrarë në jugperëndim të qytetit të Gazës, duke e çuar numrin e të vdekurve të së hënës në të paktën 38.
Mjekët thanë se shumica e viktimave u goditën nga të shtënat me armë zjarri, por banorët raportuan gjithashtu një sulm ajror. Nuk pati asnjë koment të menjëhershëm nga ushtria izraelite mbi incidentin.
HAPAT E ARDHSHËM
Një ditë pasi Trump bëri thirrje për “Bëni marrëveshjen në Gaza, ktheni pengjet”, ministri i çështjeve strategjike të Izraelit, Ron Dermer, një njeri i besueshëm i Netanyahut, pritej të hënën në Shtëpinë e Bardhë për bisedime mbi Iranin dhe Gazën, tha një zyrtar izraelit.
Në Izrael, kabineti i sigurisë i Netanyahut pritej të mblidhej për të diskutuar hapat e mëtejshëm në Gaza.
Të premten, shefi ushtarak i Izraelit tha se operacioni aktual tokësor ishte afër arritjes së qëllimeve të tij, dhe të dielën, Netanyahu tha se ishin hapur mundësi të reja për rikuperimin e pengjeve, 20 prej të cilëve besohet se janë ende gjallë.
Burime palestineze dhe egjiptiane me njohuri për përpjekjet e fundit për armëpushim thanë se ndërmjetësit Katari dhe Egjipti kanë shtuar kontaktet e tyre me të dy palët ndërluftuese, por ende nuk është caktuar një datë për një raund të ri bisedimesh për armëpushim.
Një zyrtar i Hamasit tha se progresi varet nga ndryshimi i qëndrimit të Izraelit dhe pranimi i përfundimit të luftës dhe tërheqja nga Gaza. Izraeli thotë se mund ta përfundojë luftën, vetëm kur Hamasi të çarmatoset dhe të shpërbëhet. Hamasi refuzon të dorëzojë armët.
Ministri i Jashtëm izraelit, Gideon Saar, tha se Izraeli ka rënë dakord për një armëpushim 60-ditor dhe një marrëveshje për pengjet e propozuar nga SHBA-të, dhe ia ka lënë përgjegjësinë Hamasit.
“Izraeli është serioz në vullnetin e tij për të arritur një marrëveshje për pengjet dhe armëpushim në Gaza”, u tha Saar gazetarëve në Jerusalem.
SHBA-të kanë propozuar një armëpushim 60-ditor dhe lirimin e gjysmës së pengjeve në këmbim të të burgosurve palestinezë dhe mbetjeve mortore të palestinezëve të tjerë. Hamasi do të lironte pengjet e mbetura si pjesë e një marrëveshjeje që garanton përfundimin e luftës.
Lufta filloi kur luftëtarët e Hamasit sulmuan Izrael më 7 tetor 2023, vranë 1,200 njerëz, shumica prej tyre civilë, dhe morën 251 pengje në Gaza në një sulm të papritur që çoi në ditën më vdekjeprurëse të Izraelit.
Sulmi i mëvonshëm ushtarak i Izraelit ka vrarë më shumë se 56,000 palestinezë, shumica e të cilëve civilë, sipas ministrisë së shëndetësisë të Gazës, ka zhvendosur pothuajse të gjithë popullsinë prej 2.3 milionë banorësh dhe e ka zhytur enklavën në një krizë humanitare.
Sipas Kombeve të Bashkuara, më shumë se 80% e territorit është tani një zonë e militarizuar nga Izraeli ose nën urdhra zhvendosjeje./ Reuters.
