Sabajet Shuti, 31 vjeç, anëtar i grupit kriminal shqiptar “Hellbanianz”, është dënuar me burgim të përjetshëm në Londër për vrasjen e 27-vjeçarit Lumturi Zeqja në tetor të vitit 2022. Mediat britanike raportojnë se bashkë me të është shpallur fajtor edhe vëllai i tij, Emirlion Shuti, 30 vjeç, i cili u dënua me 20 muaj burg për rolin e tij në ngjarje.
Ngjarja ndodhi mbrëmjen e 16 tetorit në zonën Church Lane në Leytonstone. Zeqja po qëndronte jashtë një kafeneje me një mik, kur vëllezërit Shuti mbërritën me dy makina. Pas një përplasjeje fizike që nisi Emirlion Shuti, Sabajet nxori një thikë dhe goditi për vdekje 27-vjeçarin, ndërsa plagosi edhe mikun e tij, i cili arriti t’i mbijetojë plagëve pas ndërhyrjes së mjekëve.
Pas krimit, Sabajet Shuti u arratis nga Mbretëria e Bashkuar duke ndryshuar pamjen dhe u largua përmes Kanalit drejt Francës. Ai u kap gati një vit më vonë, më 3 tetor 2023, në Suedi dhe u ekstradua për t’u përballur me drejtësinë britanike. Ndërkohë, Emirlion Shuti ishte arrestuar dhe akuzuar më herët për përfshirje në sulm.
Policia identifikoi autorët përmes pamjeve të kamerave të sigurisë dhe provave të mbledhura nga telefonat celularë, duke dokumentuar qartë dinamikën e ngjarjes dhe tentativën për t’u fshehur nga drejtësia.
