Një skandal mjedisor ka ndodhur në Parkun Kombëtar të Vjosës, ku në lumin e fundit të egër të Evropës është derdhur një sasi e konsiderueshme nafte, nga kompania shtetërore Albpetrol, ku gjenden rreth 150 puse aktive.
Pamjet tregojnë derdhjen e naftës bruto nga “Përroi i Madh” në afërsi të Poçemit në Mallakastër, duke shkaktuar ngordhjen e gjallesave që jetojnë në këtë habitat. Përroi mbart ndotjen nga fusha naftëmbajtëse Gorisht-Kocul.
Katastrofa mjedisore është parë nga afër nga CEO i “Riverwatch”, Ulrich Eichelmann, i cili përmes një video tregon se si lumi Vjosa ka ndryshuar tërësisht ngjyrë për shkak të naftës.
Në një postimin në Instagram, ai thotë se situata është e rëndë. Sasi e naftës së derdhur në lum ka krijuar një shtresë të paktën rreth 10 centimetra të trashë.
Lidhur me denoncimet e shumta për derdhjen e naftës në lumin e Vjosës, ka reaguar edhe Policia e Vlorës, e cila ka nisur procedim penal ndaj Përparim Memajt, përgjegjës sektori në pikën e dekantimit të naftës në Gorisht, pasi dyshohet si përgjegjës për ndotjen.
“Specialistët për Hetimin e Krimeve në Stacionin e Policisë Selenicë referuan materiale në Prokurori dhe nisën procedimin penal për shtetasin P. M., 59 vjeç, banues në Vlorë, me detyrë përgjegjës sektori i dekantimit të naftës, në fshatin Gorisht, Selenicë, pasi dyshohet se nga ky sektor janë derdhur mbetje nafte në vendin e quajtur “Përroi i Madh” të Gorishtit, duke shkaktuar ndotje”, njoftoi Policia e Vlorës.
Kujtojmë se në vitin 2023, Lumi Vjosa u shpall Park Kombëtar me vendim të Qeverisë Shqiptare. Vjosa është lumi i fundit i egër në Evropë.
View this post on Instagram
