“Trekëndëshi i Linditës”, Boçi nxjerr fotot: Nuk jemi në Korenë e Veriut por në Fier

 Deputeti i PD-së Luçiano Boçi ka publikuar disa foto që sipas tij janë bërë gjatë një aktiviteti në një shkollë 9-vjeçare. Nxënëse të vogla me kapele partizanësh, me yll të kuq e shall të kuq shihen teksa mbajnë në duar armë lodra si në formë stërvitje.

Boçi kujton trekëndëshin e dikurshëm revolucionar që mësohej në shkolla në kohën e diktaturës “mësim-punë-kalitje ushtarake” por thotë se ky është “Trekëndëshi i Linditës”.

Sipas tij në këtë aktivitet ka qenë edhe drejtori i DAR Fier. Ai thotë se kjo është më shumë se turp duke e krahasuar me Korenë e Veriut.

STATUSI I LUÇIANO BOÇIT
EDUKIM ME TREKËNDËSH
Mos u habisni!
Nuk jemi në Korenë e Veriut!
Fotot janë marrë në shkollën 9-vjeçare “Mark Dashi” Fier, përgjatë një aktiviteti ku nuk ka munguar dhe drejtori i DAR Fier.
Propaganda dhe riindoktrinimi nuk është rastësi. Madje nuk po kursen as fëmijët.
Trekëndëshi i dikurshëm revolucionar “Mësim-Punë-Kalitje Ushtarake Revolucionare”, që nisi minimin e arsimit të atëhershëm, duket se po shfaq fantazmën e tij.
Tani mund të quhet “Trekëndëshi i Linditës”. Kjo është më shumë se turp!
Në mungesë të çdo vizioni për edukimin me vlerat qytetare e europiane në shkollat tona, shabllonizmi nostalgjik është kthyer në qëllim.
p.s
Me e pa “Lideri Suprem” këtë lloj propagande, e anulon përfundimisht takimin me Trump dhe i lutet për takim këtij “Liderit Global” tonit.