Analisti Enton Abilekaj ka deklaruar se kryeministri Edi Rama ka nën kontroll të gjitha pushtetet dhe kërkon të bëhet edhe “kryetar i çdo lozhë” në Shqipëri, nga drejtësia te krimi dhe biznesi.
Sipas Abilekajt, kjo qasje ka ndërtuar një realitet të manipuluar ku edhe lufta kundër krimit dhe korrupsionit ndjek një skenar të përgatitur nga vetë Rama në bashkëpunim me drejtues të institucioneve të drejtësisë si SPAK.
Ai paralajmëron se prapa çdo goditjeje të bujshme që duket si “luftë ndaj korrupsionit”, mund të fshihet thjesht një ‘kurban politik’ për të përmbushur axhendën e integrimit evropian.
“Mendoj që Rama duke kontrolluar të gjitha pushtetet, duke qenë një njeri që ka paranojat e një autokrati, pasi kontrollon të gjitha pushtetet fillon të vuajë nga paranoja, mendon dhe vendos të bëhet kryetar i çdo lozhe që ekziston në Shqipëri. Kryetar i lozhës së krimit, kryetar i lozhës së biznesit, i lozhës së drejtësisë, i lozhës politike, etj-etj. Dhe duke e bërë këtë ai e ndërton një imazh të Shqipërisë, ashtu siç e do vet.
E ndërton një imazh të lozhës së drejtësisë, ashtu siç e do ai, të krimit po ashtu. Dhe kur sulmohet krimi, sulmohet sipas një skeme që e përcakton ai, bashkë me drejtësinë dhe bashkë me policinë. Sepse është ai që e kontrollon. Ne shohim spektaklin që bën SPAK-u sot që na tregon BE që është i vetmi që po punon në fillim, e dëgjuam dhe dje tek mbledhja e komitetit të stabilizim asociimit, që po lufton shumë SPAK-u në Shqipëri, po bën namin. Duhet mbështetur, që nuk duhet të ketë influencë politike.
Sado mik të jetë, sado afër mazhorancës të jetë një reporter i PE, sado një ekspert, një drejtor për zgjerimin në BE dhe KE të jetë afër mazhorancës, e vetmja gjë që mund të thotë në qeveri, është SPAK-u, sepse është ndërtuar në një mënyrë të tillë që diket sikur SPAK-u këtu po lufton korrupsionin dhe po bën drejtësi. Po lufton krimin e organizuar dhe po bën drejtësi. Kjo është mënyra që ka ndërtuar Rama dhe Dumani, spektaklin që kanë ndërtuar ata, për të dhënë këtë ide. Pra, do Erion Veliaj tani që të duket se ne po luftojmë korrupsionin në nivele të larta të mazhorancës, atëherë do marrësh Erion Veliajn sepse është një kurban që i duhet Edi Ramës për të ecur drejt Bashkimit Evropian. Dhe dalin mediat e Ramës, kanë shpikur një fjali që nuk e thotë askush në BE, por këta e imagjinojnë, e përhapin me idenë ‘ta hajë kush ta hajë’ me idenë: Shqipëria është pararojë në Balkanin Perëndimor për integrimin në Bashkimin Evropian.
Asnjëri se thotë këtë. Prit unë ta dëgjoj, po asnjë se thotë këtë.”, tha Enton Abilekaj në Syri TV.
