Transferimi i Mirlind Dakut te Zeniti ka dështuar përfundimisht. Sulmuesi i Kombëtares ishte gati të bënte hapin e madh në karrierë te gjigantët e Rusisë, por kushtet financiare kanë penguar firmën.
Vetë agjenti i Dakut, Haris Fakiç, ka konfirmuar në Rusi prapaskenat. “Daku nuk do të shkojë te Zeniti, transferimi ka dështuar. Nuk arritëm marrëveshje për kushtet financiare”, është shprehur Fakiç për mediat ruse.
Gjithçka raportohej e kryer disa ditë më parë, ndërsa klubet kishin arritur akordin për 8 milionë euro. Daku ka edhe një vit kontratë të mbetur me Rubinin, teksa mbetet për t’u parë ku do vazhdojë e ardhmja e tij.
