Zhgënjim i madh në Spanjë pasi kombëtarja u tyre nuk arriti dot të fitonte Ligën e Kombeve, duke humbur në finale ndaj Portugalisë nga pika e bardhë e penalltive, pasi koha e rregullt dhe ajo shtesë prej 30 minutash u mbyll në barazim 2-2.
Edhe pse humbja u vendos nga “ruleta ruse”, në Spanjë kanë bërë dy “koka turku”, duke i cilësuar si dy fajtorët kryesor: sulmuesin Alvaro Morata dhe trajnerin Luis de la Fuente.
Futja e Moratës në kohën shtesë në minutën e 111-të në vendin e Oyarzabal ishte e habitshme si për kohën e zëvendësimit të tij ashtu edhe për performancën e sulmuesit në fushë në ato minuta të mbetura.
Përfshirja e tij në skuadër kishte ndezur një debat të fortë në Spanjë që para finaleve të Ligës së Kombeve, ku pjesa më e madhe e tifozëve dhe shtypit spanjoll kishin dalë kundër grumbullimit të 32-vjeçarit, dhe penalltia e humbur mbrëmë i hodhi “benzinë zjarrit” duke i ndezur akoma dhe më shumë kritikat ndaj tij.
Shumë besojnë se prania e tij në fushë ishte e panevojshme dhe se kishte mundësi të tjera, më koherente për pjesën vendimtare.
Luis de la Fuente po ashtu mori kritika të mëdha për mënyrën si kreu zëvendësimet, veçanërisht kur ai largoi lojtarë kyç si Lamine Yamal dhe Pedri ndërsa ndeshja ishte ende e hapur.
