Dragan Stojkoviç ka pranuar se është i kënaqur me pikën që Serbia mori në Tiranë përballë Shqipërisë.
Trajneri i Serbisë, praktikisht pranoi me fjalët e tij se serbët kishin marrë një pikë që i gëzonte më shumë ata se sa kuqezinjtë që kishin dominuar sfidën pa shënuar.
“A më pëlqen rezultati? Nuk di çfarë të them. Ne erdhëm të fitonim. Formacioni tregon që ne deshëm të gjenim golin. Djemtë u treguan profesionistë, nuk iu nënshtruan atmosferës. Nuk është e thjesht të luash në këtë stadium. Shqipëria ka një skuadër të mirë dhe me cilësi. Një barazim ishte rezultati më realist. Kjo pikë është më e ëmbël për ne se për ta.
Kur ke qarkullim të mirë topi, kundërshtari vrapon më shumë. Sa më shumë vrapon, aq më shumë lodhet. Në pushimin e ndeshjes insistova që të lëviznim më shpejt topin. Mendoj se kontrolluam lojën ishim të qetë e të përmbajtur.
Dimë të luajmë dhe çfarë të bëjmë në fund. Që të fitosh ndeshjen, duhet të shënosh. Nuk mund të krijosh 10-15 raste. Nëse ke një, dy, tre raste, duhet t’i shfrytëzosh. Atë që deshëm, e bëmë. Na duhej një gol që të kompletohej. Ky barazim është më i këndshëm për ne se për Shqipërinë”, theksoi trajneri i Serbisë pas duelit.
