Tuneli i Skerfiçës, një prej pikave më të rëndësishme të rrugës Kardhiq-Delvinë, është kthyer në një burim rreziku për shoferët, për shkak të disa problemeve të rëndësishme që e shoqërojnë këtë aks.
Mungesa e një ekipi zjarrfikësish të stacionuar shpeshherë dhe më shqetësuese shkeputja e vazhdueshme e energjisë elektrike, e ka bërë këtë tunel një zonë të pasigurt për çdo kalimtar.
Pavarësisht se ky aks ka një fluks të konsiderueshëm trafiku gjatë periudhës së verës, askush nuk ka ndërmarrë masa për të adresuar këtë situatë të rrezikshme.
Kjo mungesë energjie, që është bërë një problem i përsëritur, vështirëson qarkullimin, duke lënë automjetet në errësirë dhe duke rritur mundësinë e aksidenteve, sidomos gjatë natës apo në kushte moti të këqija.
Rreth kësaj situate, ka pasur thirrje të shumta nga qytetarët dhe drejtuesit e automjeteve, që kërkojnë ndërhyrje urgjente për zgjidhjen e problemit të energjisë elektrike dhe stacionimin e një ekipi zjarrfikës në zonën e tunelit, për të garantuar sigurinë e pasagjerëve dhe shoferëve.
Ky problem që ka vazhduar për një kohë të gjatë ka krijuar një situatë të papranueshme, ku çdo kalimtar mund të përballet me rreziqe të mëdha, nëse nuk merren masa konkrete.
Pavarësisht se aksidenti mund të ndodhë në çdo moment, ende nuk ka një zgjidhje përfundimtare për këtë çështje.
