Deputeti i opozitës dhe ish-ministri i Mbrojtjes në Izrael, Avigdor Lieberman, deklaroi të enjten se Izraeli po furnizon me armë një grup në Rripin e Gazës, i cili besohet të jetë i lidhur me organizatën terroriste ISIS.
Në një intervistë për radion publike izraelite “Kan Bet”, Lieberman tha se ky grup, i njohur si klani Hamasha, përbëhet nga “kriminelë” të cilët, sipas tij, kohët e fundit janë radikalizuar dhe kanë filluar të identifikohen me ideologjinë xhihadiste të ISIS-it.
Sipas Liebermanit, Izraeli po i jep këtij grupi armë të lehta dhe pushkë sulmuese, në një përpjekje për ta përdorur si kundërpeshë ndaj Hamasit, një taktikë që, sipas tij, ngjason me politikën e mëparshme të Kryeministrit Netanyahu për të dobësuar Autoritetin Palestinez përmes forcimit të Hamasit.
“Përfundimisht, këto armë do të kthehen kundër nesh,” paralajmëroi ai.
Pas këtyre deklaratave, reagoi zyra e Kryeministrit Netanyahu, duke thënë se “Izraeli po punon për të mposhtur Hamasin në mënyra të ndryshme, në përputhje me rekomandimet e të gjitha strukturave të sigurisë”.
