Gjermania shihej si favorite për një vend në finalen e Ligës së Kombeve, teksa përballej në shtëpi me Portugalinë.
Por roli i favoritit ka mbetur në letër, sepse në fushën e lojës ka qenë Portugalia ajo që ka luajtur më mirë dhe me meritë ka siguruar një vend në finalen e së dielës në Mynih.
Një tjetër zhgënjim në Gjermani dhe trajneri Nagelsmann nuk u ka shpëtuar kritikave. Përtej tyre, vetë Negelsman ka folur për mediat gjermane pas takimit, duke e bërë të qartë se skuadra e tij duhej të kishte luajtur më mirë për të qenë ajo finaliste.
“Na mungoi uria dhe agresiviteti për të luftuar për çdo top”. Sipas tij, mungesa e lojtarëve të rëndësishëm si Rüdiger, Musiala dhe Schlotterbeck nuk ishte justifikim.
Problemi kryesor ishte mungesa e intensitetit dhe përkushtimit nga disa futbollistë, sidomos në pjesën e parë, kur Gjermania nuk e kishte kontrollin e ndeshjes.
“Kur luan një për një dhe disa lojtarë nuk japin 100 për qind, përfundon në inferioritet numerik,” tha Nagelsmann.
Ai theksoi se përballë kombëtareve si Portugalia, që kanë më shumë lojtarë me kreativitet dhe instinkt individual, Gjermania duhet të jetë gjithmonë në nivel maksimal.
“Ky është një mësim i mirë. Duhet të mësojmë dhe të përmirësohemi,” shtoi ai, duke vënë theksin te rëndësia e përgatitjes për ndeshjen për vendin e tretë, që do të luhet të dielën kundër humbësit të duelit Spanjë–Francë.
Për Gjermaninë, kjo ndeshje është më shumë se sa për një medalje bronzi, është testi i karakterit për një skuadër që synon të rikthehet në majat e futbollit evropian.
