Rreth 200 të burgosur në burgun Marassi në Xhenova të Italisë nisën një trazirë masive pasditen e së mërkurës, duke shkaktuar momente tensioni dhe kaosi në institucionin e vuajtjes së dënimit.
Sipas mediave italiane, gjithçka nisi me protestën e disa të burgosurve, të cilët dolën nga qelitë e tyre dhe u drejtuan drejt zonës së brendshme të sigurisë, afër barrierave që paraprijnë murin rrethues të burgut. Situata degradoi më tej kur u hapën edhe qelitë e tjera, duke u përfshirë në trazira dhjetëra persona dhe duke shkaktuar dëme materiale, përfshirë shkatërrimin e disa qelive.
Disa prej të burgosurve u ngjitën në çatitë e ndërtesave dhe në rrugicat përgjatë mureve rrethuese, por pa arritur të dalin jashtë perimetrit të sigurisë. Policia dhe forcat e karabinierëve qëndronin në gatishmëri jashtë institucionit, të gatshëm për të ndërhyrë nëse situata do të përshkallëzohej më tej.
Për të neutralizuar trazirat, u desh ndërhyrja e rreth 100 oficerëve të rendit. Gjatë incidenteve, stafi mjekësor i burgut u evakuua në dhoma të sigurta, larg zonave të rrezikut, për të shmangur kontaktin me të burgosurit.
Raportimet fillestare flasin për një rebelim të organizuar nga një grup të burgosurish kundër personelit të burgut, të cilët morën përkohësisht nën kontroll një seksion të objektit. Po ashtu, ka dyshime se trazirat përfshinë edhe një përpjekje për arratisje, megjithëse kjo nuk është konfirmuar zyrtarisht.
Ndërkohë, mediat vendase raportojnë për një incident të rëndë që mund të ketë nxitur revoltën: gjashtë të burgosur dyshohet se kanë përdhunuar një tjetër të burgosur gjatë ditëve të fundit. Viktima është dërguar mbrëmjen e kaluar në spitalin e qytetit për trajtim mjekësor.
Autoritetet italiane kanë nisur hetimet për të zbuluar shkaqet e sakta të trazirave dhe për të verifikuar nëse ka pasur tentativa konkrete për arratisje.
