Në Korçë mendojnë vetëm për festën e titullit kampion dhe të mërkurën, kur do të luhet ndeshja SkënderbeuVllaznia në orën 17:00, gjithçka në stadium do të jetë e veshur me ngjyrat bardhëkuqe. Në një situatë të tillë, “Panorama Sport” zbardh të gjitha detajet e festës që i pret korçarët të mërkurën, para, gjatë dhe pas ndeshjes kundër Vllaznisë.
Në më pak se 24 orë nga dalja në treg janë shitur rreth 1500 bileta, duke treguar një ritëm të kënaqshëm, ndërsa sipas pritshmërive llogaritet që numri i tifozëve në stadium t’i kalojë 5000. Nga ana tjetër, përgatitjet janë bërë edhe në kuadër të dekorit të stadiumit. Më shumë se 5000 flamuj të vegjël bardhekuq janë porositur nga klubi, ndërsa po ashtu edhe shumë flakadanë dhe tymuese bardhekuqe do të ndezin atmosferën në stadiumin “Skënderbeu”.Për “ngjyrosjen” e stadiumit do të shërbejnë edhe flamujt bardhekuq, që tifozët do t’i gjejnë gati në shkallët e stadiumit. Sigurisht, që edhe një numër i madh flakadanësh do të shërbejnë për të ndezur flakë stadiumin, por festa nuk do të mbarojë atje. Tifozët kanë përgatitur që të nxjerrin diçka edhe në qytet, teksa menjëherë pas festës në stadium, qyteti pritet që të ndizet. Festa me flakadanë dhe flamuj do të vijojë në pedonalen e qytetit për disa minuta.
CEREMONIA
Sigurisht që një pjesë të mirë do ta zërë ceremonia zyrtare e Federatës Shqiptare të Futbollit për dhënien e titullit kampion. Ceremoni që pritet të fillojë në orën 19:00, menjëherë pasi të mbyllet takimi mes bardhekuqve dhe Vllaznisë. Për këtë janë porositur 40 medalje për kampionët, që do t’u jepen një e nga një të gjithë lojtarëve.
E veçanta në këtë ceremoni është se një medalje do të jetë enkas edhe për mesfushorin Afrim Taku, pavarësisht se ky i fundit ndodhet në SHBA. Në momentin e ngritjes së trofeut, i gjithë stadiumi pritet që të ndizet nga fishekzjarrët, veç atyre që do të ndizen nga ana e federatës.
Pas dorëzimit të titullit, ekipi do të bëjë dy xhiro në pistë për t’u përshëndetur me tifozët dhe më pas do të shpërthejë festa e përbashkët. Nuk dihet ende nëse titullin do t’ia dorëzojë kapitenit Orges Shehi vetë kreu i FSHF-së, Armand Duka, shkruan PanoramaSport.
POST-CEREMONIA
Pas dhënies së titullit kampion, klubi do të organizojë një pritje gala për të gjithë “aktorët” e titullit, figura të rëndësishme të qytetit, por edhe tifozë që do të jenë të ftuarit e presidentit Ardjan Takaj, në një banket që do të zhvillohet në “Life Gallery”, vendi i zakonshëm i “ujqërve”.
Pas banketit, festa do të vijojë në një prej klubeve të qytetit deri në agim, ku nuk do të mungojë alkooli dhe muzika. Për ta bërë sa më elektrizuese mbrëmjen, klubi ka ftuar këngë- tarin Klajdi Haruni për të performuar live.
