Gazetari Genc Burimi u shpreh se administrata amerikane ndodhet në një situatë të vështirë në dy pika të globit.
Ai theksoi se mungesa e një filozofie të qartë politike ka krijuar pasiguri në vendimmarrje. Sipas Burimit, kjo është reflektuar në qëndrimet ndaj Iranit, Gazës, si dhe në çështje të tjera ndërkombëtare.
Ai u shpreh se deklaratat e fundit janë përpjekje për të fituar kohë, derisa të ndërtohet një doktrinë e qëndrueshme. Ndaj çështjeve si Tajvani, Kosova dhe Shqipëria, administrata amerikane ende nuk ka një pozicion të qartë.
“Ka kohë që kjo administratë është në siklet në dy pikat e globit, sepse ende nuk ka një filozofi të qartë për rrugën që do të ndjekë. Kjo është parë shumë qartë në lidhje me Iranin, Gazën, e të tjera, por për çështjet që lidhen me Tajvanin, Kosovën dhe Shqipërinë ende nuk ka një pozicion të qartë.
Kjo deklaratë mund të shihet më shumë si një përpjekje për të fituar kohë, në mënyrë që administrata të ndërtojë një doktrinë të sajën. Është një deklaratë mjaft inteligjente në aspektin e menaxhimit të kohës, për të shqyrtuar ankesat dhe për të reflektuar më tej.
Kjo administratë, në mënyrë logjike, shpreh urimet për popullin shqiptar pas zgjedhjeve, sepse mund të kishte ndodhur edhe një kaos i mundshëm në Shqipëri. Duhet theksuar që zgjedhjet, në pamje të parë, nuk u shoqëruan me dhunë, edhe pse mafia ka bërë punën e saj.
Ky mesazh nga Shtetet e Bashkuara përshëndet popullin shqiptar për maturinë e treguar. Së dyti, mesazhi shpreh gatishmërinë për të bashkëpunuar me Shqipërinë”, tha Burimi per Syri tv.
