Një rrjet prostitucioni është goditur nga policia e Vlorës, ku është shpallur në kërkim një 29-vjeçare me shtetësi braziliane.
Policia bën me dije se e reja braziliane akuzohet për veprat penale “Trafikimi i personave të rritur me qëllim shfrytëzimin për prostitucion” dhe “Shfrytëzimi i prostitucionit”.
Ajo dyshohet se shfrytëzonte për qëllime prostitucioni dy bashkëkombëse të saj, të moshave 34 dhe 30 vjeçe, në një apartament në lagjen “Lef Sallata” të qytetit të Vlorës.
Të dyja gratë e përfshira janë proceduar në gjendje të lirë për veprën penale “Prostitucioni”.
“Specialistët për Hetimin e Trafiqeve referuan materialet në Prokurori dhe shpallën në kërkim shtetasen braziliane B.F., 29 vjeçe, pasi dyshohet se shfrytëzonte për prostitucion në një apartament në lagjen ‘Lef Sallata’, dy shtetase të tjera braziliane, përkatësisht 34 dhe 30 vjeçe. Këto dy shtetase u proceduan në gjendje të lirë për veprën penale ‘Prostitucioni’,” thuhet në njoftimin e policisë.
Materialet hetimore janë referuar Prokurorisë Vlorë për veprime të mëtejshme.
