Ka përfunduar në orën 19:00 orari zyrtar i procesit të votimit për zgjedhjet parlamentare në të gjithë vendin, i cili në orën 07:00.
Deri më tani rezulton një numër i ulët i pjesëmarrësve të zgjedhësve, ku sipas shifrave të përditësuara të Komisionit Qëndror të Zgjedhjeve në rang qarku është 41.37 %, por që nuk janë sjelë të dhënat e të gjitha qendrave të votimit.
Gjithsej kanë votuar deri më tani 1 075 403 zgjedhës, ndërkohë që në total kanë qenë 3 713 761 shtetas shqiptarë me të drejtë vote.
Qarku me pjesëmarrjen më të lartë në votime rezulton ai i Dibrës me 48.16 %, ndjekur nga Tirana me 47.83 % dhe Kukësi me 45.83 %. Ndërkohë, Qarqet me pjesëmarrjen më të ulët janë Vlora me 28.94 %, Shkodra me 36.00 % dhe Gjirokastra me 36.14 %.
Vlen të theksohet fakti se në zgjedhjet e vitit 2021 votuan 1.67 milionë shqiptarë ose 46.3% e votuesve.
Gjithsesi, duhet theksuar fakti se në këto zgjedhje për herë të parë ka votuar edhe diaspora, ku në KQZ kanë mbërritur deri në këto momente mbi 188 mijë vota me zarfa. Ato nuk llogariten tek pjesëmarrja brenda vendit.
Procesi i votimit sot u shoqërua me incidente të shumta, ku grupe patronazhistësh të PS-së qëndronin pranë qendrave të votimit me listat e zgjedhësve. Ndërkohë, në qendrën e votimit të Vorës, deputetët Flamur Noka dhe Albana Vokshi u përplasën me persona me precedentë penalë si Xhoni Asllanaj dhe Albert Xhabaftit, pasi këta të fundit futeshin në qendrën e votimit edhe pse të paautorizuar.
Gjithashtu, pati të shtëna me armë zjarri edhe në Milot. Një konfilkt i nisur brenda një qendre votimit mes Kastriot Preng Perdoda dhe Asti Lleshit, degradoi më pas jashtë perimetrit të qendrës së votimit në të shtëna me armë nga Kastriot Perdoda.
Po ashtu, të shumta kanë qenë edhe rastet e fotografimit të votës gjatë votimit nga qytetarët, ku pati disa qytetarë të arrestuar në Librazhd, Elbasan, Tiranë dhe Këlcyrë.
Pas mbylljes së procesit të votimit, kutitë do të grumbullohen në KZAZ-të dhe pasi të kenë ardhur të gjitha do të nisë edhe procesi i numërimit.
