Drejtuesi politik i qarkut Lezhë, Agron Gjekmarkaj, ka reaguar për mediat në lidhje me arrestimin e bashkëshortit të kandidates për deputete të Partisë Demokratike, Elda Hoti.
Gjekmarkaj theksoi se kjo është një ditë e rëndësishme për Shqipërinë, ku qytetarët duhet të përfitojnë nga të drejtat e demokracisë dhe të jenë vigjilentë ndaj çdo përpjekjeje për të minuar procesin zgjedhor.
Ai vuri në dukje se, pavarësisht se kjo ditë është e shenjtë për demokracinë, organet shtetërore po krijojnë një situatë antidemokratike, duke u përqendruar më shumë në ndjekjen e qytetarëve që mbrojnë votën, se sa të luftojnë shitblerjen e votës.
Gjekmarkaj e quajti këtë një skenar politik dhe bëri thirrje për një reagim të menjëhershëm nga organet kompetente.
Deklarata:
Është një ditë e rëndësishme për Shqipërinë, qytetarët duhet të marrin benefitet e demokracisë. Shqiptarët duhet të jenë vigjilentë dhe të jenë pjesëmarrës. Unë sot kam me vete edhe vajzën time, e cila nuk voton, por duhet ta edukojmë me shenjtërinë e votës, sepse indiferenca është armiku më i madh i demokracisë. Për sa i përket pyetjes, mendoj se organet shtetërore po na vendosin në një situatë antidemokratike, sepse duhej të ishin ata garant të procesit. Në vend që të merren me shitblerësit e votës, po merren me qytetarët që e mbrojnë atë. PD dënon me forcë këtë si një skenar politik dhe po evidenton pjesëmarrësit për t’ju drejtuar organeve kompetente.
