Vllaznia mori një triumf në shifrat 2-1 ndaj Dinamos në gjysmëfinalet e kampionatit, duke siguruar kështu finalen e 12 majit për edicionin 2024-‘25.
Por, pavarësisht suksesit dhe gëzimit pas 90 minutave, ajo që shqetëson te kuqeblutë është gjendja fizike e dy titullarëve të skuadrës. Fjala është për Ardit Deliun dhe Erdenis Gurishtën, që shfaqën probleme gjatë 90 minutave.
I pari u zëvendësua në minutën e 41-të të takimit nga ana e Sales, ku pas një përplasjeje në mesfushë, ish-futbollisti i Tiranës nuk ishte në gjendje të vijonte lojën.
Ai doli nga fusha duke çaluar dhe në festimet e ekipit pas vërshëllimës së gjyqtarit nuk u pa shumë i përfshirë. Kjo, për shkak të këmbës që nuk e lejonte të ishte edhe aq entuziast sa pjesa tjetër e skuadrës.
Po ashtu edhe Gurishta, i cili në 10 minutat e fundit të ndeshjes sakrifikoi, duke qëndruar në fushë i dëmtuar.
Kjo, pasi shkodranët i kishin mbyllur zëvendësimet dhe mbrojtësi i djathtë, pavarësisht dhimbjeve, vendosi të qëndronte në fushë, duke mos preferuar ta linte skuadrën me 10 futbollistë.
Gjendja e të dy lojtarëve do të shihet në ditët në vijim, pasi te shkodranët patjetër duan t’i kenë nën dispozicion dy prej elementëve kryesorë të formacionit.
