Me dopietën e tij mbajti në lojë Dinamon për të fituar në fund edhe Kupën e Shqipërisë. Peter Itodo Mandela tregoi se mbetet një “vrasës” para portës, ndërsa pohon në fund të ndeshjes se nuk ka fjetur para kësaj finaleje që e kanë pritur ta mbyllnin ashtu si duhej.
“Ndihem shumë mirë. Një ditë më parë po mendoja vetëm për këtë ndeshje dhe mund të them se nuk kam fjetur për këtë finale. Faleminderit Zotit për gjithçka. Jemi stërvitur shumë dhe e meritonim të ishim ne fituesit e këtij trofeu. Të parës që ia dedikoj, është mamaja, ndërsa i dyti menaxheri, i cili erdhi nga Nigeria për këtë ndeshje”, u shpreh fillimisht sulmuesi i bluve.
Tani fokusi i Dinamos do të jetë padyshim kalimi me sukses edhe ndaj Vllaznisë, ku i duhet të fitojnë për të siguruar finalen. Mandela ka besim se do t’ia dalin sërish, sepse kanë kohë që përgatiten pikërisht për këto momente vendimtare.
“Patjetër që do ta fitojmë dhe jemi përgatitur shumë për këtë. Na duhet që ta fitojmë”, theksoi sulmuesi.
Duke qenë se la lojën i dëmtuar, Mandela qetëson të gjithë, pasi mesa duket nuk ka dëmtim serioz dhe do të jetë në fushë ndaj shkodranëve.
