Një aeroport në Zelandën e Re ka tërhequr vëmendjen ndërkombëtare duke u cilësuar si një nga më të frikshmit në botë, jo për shkak të kushteve ekstreme të motit apo vendndodhjes në ndonjë majë mali, por për një arsye vërtet të pazakontë: një linjë hekurudhore që e pret pistën në mes.
Bëhet fjalë për Aeroportin Gisborne, i cili ndodhet në bregun lindor të Zelandës së Re. Ky aeroport unik është përfshirë në listat ndërkombëtare të pistave më sfiduese për pilotët, për shkak të bashkëjetesës së paprecedentë mes trafikut ajror dhe atij hekurudhor.
Në mes të pistës kryesore kalon një linjë hekurudhore që përdoret nga një tren me avull – lokomotiva historike e ‘Gisborne City Vintage Railway’, e cila operon vetëm rreth 15 herë në vit, kryesisht gjatë sezonit turistik. Misioni për të shmangur përplasjet e mundshme i takon kontrollorëve të trafikut ajror në kullën e aeroportit, të cilët duhet të koordinojnë me kujdes lëvizjet e avionëve dhe trenit.
Treni historik shërben si një atraksion për turistët që vizitojnë qytetin e Gisborne dhe bëjnë udhëtime panoramike deri në Muriwai.
Megjithëse përdoret rrallë nga treni, linja hekurudhore mbetet një sfidë për pilotët dhe një kuriozitet për pasagjerët që për herë të parë zbulojnë se pista ku ndodhen mund të përshkohet nga një lokomotivë me avull.
