Qytetarja B.L denoncon në emisionin “Stop” në Tv Klan shtetasin nga Ksamili Agron Lile, pasi ky i fundit i ka zaptuar shtëpinë. Zonja tregon se i ati, që punon e jeton në emigracion i ka blerë një shtëpi në Ksamil 25 metra katrorë godinë një-katëshe dhe truall.
Prona u ble në një ankand bankar, pasi Agron Lile e kishte lënë kolateral, nuk e kishte paguar. Sot zonja disponon certifikatën e pronësisë, por nuk e gëzon asnjë ditë pronën e saj, pasi ish-pronari ka ndërruar bravat e madje ka lënë dhe një qytetar brenda me qira.
“Ka një ngarkesë emocionale dhe një vlerë të madhe për mua kjo pronë. Im atë emigrant i një jetedhe aktualisht që flasim vazhdon që të jetë emigrant, ai ma bën dhuratë këtë pronë. Teksa unë përballem me këto lloj situatash ai e vuan jashtëzakonisht shumë sepse thotë unë nuk të kam blerë një pronë unë të kam blerë një hall. I jam drejtuar emisionit ‘Stop’ sepse prej vitit 2021 jam bërë pronare e një objekti 25 metra katrorë dhe një trualli 33 metra katrorë dhe deri tani që po flasim nuk arrij që ta gëzoj pronën time të cilën kam blerë në një bankë në ankand dhe ish-pronari të cilin unë nuk e njoh as nga dokumenti që unë kam marrë nga banka kur e kam blerë në ankand këtë pronë nuk e pranon që e ka humbur.
E ka lënë në kolateral dhe sipas të gjitha rregullave e ligjeve unë jam bërë pronare e saj. Por, edhe sot e kësaj dite unë nuk e gëzoj pronën time. Ish-pronari quhet Agron Lile, unë nuk duhet që të kisha asnjë dijeni të tij sepse edhe nga banka ishte emri i tij, por kur unë vij në objektin në të cilin u bëra pronare për të gëzuar pronën ai thotë se nuk e njeh si vendim atë të bankës dhe se nuk e ka humbur pronën e tij si kolateral që nuk ka shlyer detyrimet kundrejt bankës.
Personi ka bërë vetëgjyqësi gjatë këtyre viteve dhe unë jam përballur me konflikte verbale, apo mashtrim nga ana e tij. Unë kam qëndruar në këtë ambient vetëm 10 ditë. Ish-pronari thyen bravën e derës dhe sillet sikur është pronari faktik i saj. Ka ndërtuar në pronë, ka shtyrë territorin në këtë pronë, ka futur njerëz me qira në mënyrë të vazhdueshme”, thotë për mikrofonin “Stop” denoncuesja.
Çështja ka shkuar në prokurorinë e Sarandës, por prokurorja Valbona Maja ka dalë me vendimin e mosfillimit të hetimeve edhe pse i akuzuari ka kryer vetëgjyqësi, mosdeklarim të ardhurash dhe falsifikim dokumentesh.
“Kallëzimi i ka kaluar prokurorisë dhe prokuroria ka vendosur mos hapjen e hetimeve. Kjo është ajo që vërtet mua më shqetësoi, pra unë prita me durim dhe qytetari për disa vite. Shkoj bëj kallëzim, ju e shikoni dhe e konstatoni edhe vetë që ka disa vepra penale edhe kur prokuroria vendosi mos hapjen e çështjes atëherë unë u shqetësova tepër dhe iu drejtova emisionit ‘Stop’”, shtoi denoncuesja.
“Stop” arriti që të kishte dhe një komunikim me prokuroren Valbona Maja.
Prokurorja Valbona Maja: Alo, përshëndetje kush jeni? Ça kërkesash ke mund t’ia drejtosh institucionit. Zotëri unë ta dhashë përgjigjen, nuk ke aspak të drejtë të më telefonosh. Ku e ke marrë autorizimin? Nuk ke absolutisht aspak të drejtë. Bëji kërkesat zyrtarisht.
IMT Sarandë ka konstatuar ndërtim pa leje në objekt, por nuk ka ndërhyrë, pas vendimit të prokurores. Ish-pronari përdor si alibi dy ndërtime pa leje, që i ka bërë objektit vite më parë, të cilat i ka deklaruar tek Aluizni, por nuk ka marrë përgjigje. Ai madje ka tentuar, t’ia shesë 30 mijë euro zonjës, shtesat pa leje e pa titull pronësie.
“Kam bërë denoncim edhe pranë IMT-së të cilët kanë bërë këqyrjen dhe kanë dhe proces-verbalin, normalisht duhet që të merret vendimi. IMT ka bërë veprimet një muaj më parë dhe deri më tani nuk ka asnjë masë”, shtoi denoncuesja.
Për çështjen e shtëpisë në Ksamil, “Stop” takoi ish-pronarin Agron Lile, i cili pranon që e ka zaptuar me vetëgjyqësi pronën e zonjës B.L, duke përmendur sërish shtesat që ka bërë.
Agron Lile: Ajo e ka marrë pjesën e saj.
Gazetari: Po jo, nuk e ka marrë…!
Agron Lile: Aty është një shtesë, shtesën unë i kam thënë merre ta gëzosh, me jep mua, çfarë investimi kam bërë dhe merre.
Gazetari: Po shtesën ajo nuk e do, mund ta prishë.
Agron Lile: Le ta prishi ajo, është me vetëdeklarim, që ta prishi ajo, duhet të dalë skualifikimi dhe le ta marri…!
Agron Lile: Ajo ka pronën, ka metrat e saj, t’i marrë, t’i gëzojë! Nuk i futem fare, po unë një metër e kam me vetdeklarim. Që ta marri ajo, duhet të skualifikohet, flasim siç është tani, ajo do marrë pjesën e saj, atë, që e kam timen nuk e le, edhe një metër, që kam timen, nuk e le, deri në momentin e skualifikimit. Po mirë mo, le të m’i japë mua lekët mua dhe le ta marrë siç është…
Gazetari: Po si të t’i japi lekët ty, kur nuk e ke me dokumente…?!
Agron Lile: Po e kam me vetëdeklarim.
Gazetari: Po nuk e ke me letra.
Agron Lile: Po vetëdeklarimi për çfarë është…? Mua s’ma ndjen fare për atë pronën atje, se kam prona plot.
Meqë policia nuk pranoi të mbante një proces-verbal për sendet, që ishin në objekt vetë zonja hap shtëpinë e saj, duke mbledhur sendet e qiramarrësit të Agron Liles, të cilat i dorëzon në polici.
Gazetari: Do mbani procesverbal kur ta hapë portën zonja, se kështu i thonë këta zotërinjtë? Na e shpjego pak.
Punonjësi i policisë Ksamil: Jo portën e hap privatisht, nuk e hapim ne.
Gazetari: Po, po, po!
Punonjësi i IMT: Duhet ta hapi në prezencën tuaj.
Punonjësi i policisë Ksamil: Jo, duhet ta hapësh ti.
Punonjësi i IMT: Jo unë, jo! Duhet ta hapi zonja.
Punonjësi i policisë Ksamil: Pse s’ja hap ti, po duhet ta hap unë?
Punonjësi i IMT: Po unë s’jam polic.
Kur u duk se gjithçka u zgjidh, të nesërmen Agron Lile shkon dhe shkallmon bravën dhe vë kamera në objekt, duke e kthyer situatën në pikën zero./tvklan
