Everton është gati të njoftojë përfshirjen e një investitori të ri në strukturën e pronësisë së klubit. Bëhet fjalë për miliarderin amerikan 62-vjeçar, Christopher Sarofim, një menaxher fondesh i njohur dhe aksionar minoritar i skuadrës së NFL, Houston Texans.
Sarofim do t’i bashkohet grupit pronar të Evertonit, Roundhouse Capital, dhe do të ketë një rol si vëzhgues në bordin drejtues të klubit. Kontrolli i përditshëm i Evertonit do të mbetet në duart e The Friedkin Group (TFG), që e bleu klubin nga Farhad Moshiri në dhjetor të vitit të kaluar.
Kompania e tij, Sarofim International Management, administron asete me vlerë rreth 31 miliardë dollarë dhe pasuria personale e Sarofim thuhet se kap shifrën mbi 3.7 miliardë dollarë. Paratë e tij do të investohen në Roundhouse Capital, dhe jo drejtpërdrejt në klub, ndërkohë që nuk do të emetohen aksione të reja për momentin.
Sarofim është investitori i parë i ri që i bashkohet grupit pronar të Evertonit, por priten edhe të tjerë në të ardhmen. TFG po kërkon investitorë me aftësi dhe kontakte të veçanta, jo domosdoshmërisht emra të famshëm, ndryshe nga klubet e tjera angleze që kanë tërhequr investitorë si Luka Modrić (Swansea), JJ Watt (Burnley), apo Will Ferrell dhe Russell Crowe (Leeds).
Që prej marrjes së kontrollit, TFG ka ndërmarrë ndryshime të rëndësishme: shkarkoi trajnerin Sean Dyche në janar dhe e zëvendësoi me David Moyes, i cili siguroi mbijetesën në Premier League.
Gjithashtu, drejtori ekzekutiv, Angus Kinnear, do të bashkohet me klubin këtë verë nga Leeds, ndërsa drejtori sportiv Kevin Thelwell do të largohet kur t’i përfundojë kontrata muajin tjetër.
Një arritje e madhe ishte dhe ulja e borxhit të klubit, që kishte kapur mbi 700 milionë £. Everton përfitoi një paketë financimi prej 350 milionë £ me interesa shumë më të ulëta, duke i kursyer klubit deri në 50 milionë £ në vit.
Këto fonde do të përdoren për përfundimin e stadiumit të ri me 52,888 vende në Bramley-Moore Dock, që do të hapet këtë verë.
Ndërkohë, po zhvillohet një studim për ta kthyer stadiumin ‘Goodison Park’ në shtëpinë e skuadrës së femrave, me rezultatet që priten deri në fund të majit.
