Partizani e justifikoi etiketën si favorit për titullin në volejboll për meshkuj duke fituar finalen e parë të play-off-it ndaj Skënderbeut.
Në ndeshjen e luajtur në Sallën Sportive të Farkës, kampionët në fuqi triumfuan 3-0, duke hedhur hapin e parë drejt mbrojtjes së trofeut.
Si një ekip që nuk ka humbur asnjë set në kampionat, ndërsa këtë sezon ka humbur vetëm një set në Kosovë në Ligën “Gjergj Kastrioti”, të kuqtë vendosën ritmin e finales.
Korçarët nuk u dorëzuan lehtë në setin e dytë, edhe pse ishin prapa, duke e humbur vetëm me 4 pikë, 21-25.
Në setin e tretë, Partizani shfrytëzoi përgatitjen më të mirë fizike, por edhe përvojën, dhe nuk diskutoi asgjë, u shkëput që në fillim dhe shifrat flasin qartë: 25-7.
Finalja e dytë e plej ofit për titull në volejboll për meshkuj do të luhet më 24 prill në Korçë, ndërsa kampion i vendit shpallet ekipi që fiton i pari tri ndeshje.
Partizani ka marrë çdo trofe deri tani si Kupën e Shqipërisë, Superkupën, Ligën “Gjergj Kastrioti” dhe Kupën Pavarësia.
