Mario Beshiraj është heroi i Teutës. Goli i tij i tretë me durrsakët, kundër Tiranës, u siguroi atyre qëndrimin në kategori.
Si “ish”, nuk festoi, ndërsa theksoi se ndien keqardhje për situatën ku ndodhen bardheblutë.
Duke folur për “Panoramasport” ai tregoi se nuk festoi golin pasi është rritur në akademinë bardheblu edhe pse siç vazhdoi ai nuk iu dha mundësia në ekipin e parë për të treguar potencialin e plotë.
“Ndaj Tiranës shënova gol shumë të bukur, i cili na mbajti në kategori dhe nuk festova, tregon shumë. Të dy ekipet ishin në një pozicion të vështirë dhe luanin për mbijetesën.
Mua më erdhi keq për Tiranën edhe pse ky ekip nuk është për të ardhur keq. Unë jam profesionist për të bërë punën time. Përsa i përket mosfestimit, unë kam luajtur me akademinë.
Si profesionist, kam debutuar me Tiranën, jam rritur në atë ambient. Kam kujtime të bukura, por në të vërtetë nuk është se mund dha shumë mundësia, që unë të tregoja potencialin tim. Jeta vazhdon, ashtu si futbolli dhe Tirana që sheh përpara. Hakmarrje nuk ka.
Unë me veten time kam bërë paqe dhe s’kam përse të hakmerrem ndaj dikujt. Unë futem në fushë dhe bëj atë që duhet të bëj, paçka se kë kam përpara, Tiranën apo ndonjë skuadër tjetër.” – u shpreh Beshiraj.
