Gjykata e Fierit ka lënë në fuqi masat e sigurisë “arrest me burg” për dy nipat e ish-kryebashkiakut të Mallakastrës, Agron Kapllanaj, Ledjan dhe Klaudio Kapllanajn dhe shtetasin Gerald Kollçaku.
Ata u arrestuan pas incidentit të regjistruar mbrëmjen e të martës, ku dhunuan hetuesit e Byrosë Kombëtare të Hetimit në Fier, pas përplasjes me këta të fundit. Mbi ta rëndon akuza “goditje për shkak të detyrës”, teksa vendimi është dhënë nga gjyqtari Alfred Konomi.
Seanca u mbajt me dyer të mbyllura, teksa gjatë dëshmisë ata kanë thënë se nuk i kanë njohur oficerët e BKH-së, pasi do të silleshin ndryshe nëse ata do të ishin prezantuar që në fillim. Ata petenduan hyrjen pa leje në pronën e tyre të agjentëve të kamufluar që nuk u prezantuan.
Në reagimet për mediat, Agron Kapllanaj ka deklaruar se dy herë gjatë ditës së martë është shfaqur në vendin e parkimit të firmës së vëllait të tij një automjet i pa loguar dhe me targa civile. Sipas tij, personat që ishin me atë mjet kanë ngritur një dron dhe nuk janë prezantuar si agjentë të BKH-së, por kanë deklaruar se janë të interesuar për një tokë aty pranë.
Pranë biznesit të Kapllanajt janë dhe zyrat e subjektit të tij politik, ku ish-kryebashkiaku nuk kandidon vetë në këto zgjedhje, por mbështet një kandidat të Enkelejd Alibeajt.
Ndërkohë, BKH në komunikatën për mediat tha se hetuesit e saj dhe efektivët e Policisë së Shtetit po kryenin detyra hetimore të deleguara, në kuadër të një hetimi të SPAK, teksa pretendojnë se janë sulmuar pa asnjë motiv.
