Drejtuesi politik i Partisë Demokratike në Berat, Eno Bozdo ka denoncuar rastet e shtrimit të rrugës me asfalt elektoral, teksa pak ditë na ndajnë nga 11 Maji.
Këto punime janë duke u kryer në fshatin Moravë të Beratit, në zonën e quajtur lagja e “Hatillarëve”. Siç shihen nga pamjet, makina të rënda po hedhin asfalt në rrugët e kësaj zone.
Sipas tij, në këmbim të shtrimit të rrugës qytetarëve u kërkohet vota për ish-kryebashkiakun Ervin Demo, që tashmë kandidon për deputet.
Bozdo shprehet se ky është krim zgjedhor dhe kërkon që institucionet të ndërhyjnë sepse kjo mënyrë e blerjes së votës është skandaloze dhe mbi të gjitha ndikon në rezultatin zgjedhor.
“Shtrim asfalti elektoral në mes të ditës, rruga Hatillarëve, Moravë, Berat.
Pa asnjë tabelë treguese apo projekt të miratuar ligjërisht!
Një krim elektoral i hapur, që javën e fundit po gëlon në të gjithë qarkun Berat.
Duhet që institucionet të ndërhyjnë sepse kjo mënyrë e blerjes së votës është skandaloze, arrogante dhe mbi të gjitha ndikon në rezultatin zgjedhor!”– shkruan Bozdo krahas videos.
