Në Gjykatën e Posaçme po zhvillohet sot një tjetër seancë gjyqësore për dosjen “Plumbi i Artë”.
Një prej të pandehurve, Xhuljan Hoxha, ka deklaruar se në një nga takimet që ka zhvilluar me Erjon Alibeajn, ky i fundit i ka folur për vrasjen e Kastriot Kilës, njohur ndryshe si Oti. Sipas Hoxhës, Alibeaj ka porositur vrasjen e Kilës, duke përmendur si motiv lidhjet intime të Kilës me bashkëshorten e Alibeajt.
Nga ana tjetër, Erjon Alibeaj, bashkëpunëtori i drejtësisë, e ka cilësuar këtë deklaratë si të pavërtetë dhe ka kërkuar që mediat të tregojnë kujdes me informacionet që përcillen.
Ndërkohë, një tjetër i pandehur, Petrit Qoli, ka bërë deklarata shqetësuese gjatë seancës, duke shprehur frikën se mund të vdesë nga gjendja e tij shëndetësore dhe nga presioni i burgut. Ai ka kërkuar ndihmë për gjendjen e tij, duke shprehur dëshpërim për mos takimin me familjen dhe për vështirësitë që ka kaluar gjatë periudhës së burgut.
Xhuljan Hoxha: Dua të deklaroj se në një nga takimet që kam zhvilluar me Erjon Alibeajn, ai më ka folur për vrasjen e Kastriot Kilës, Otit. Ai më ka treguar se si e ka porositur vrasjen e Kastriot Kilës. Financues dhe organizator i kësaj ngjarjeje ishte Erjon Alibeaj, jo Suel Çela. Motivi ishte sepse Ot Kila kishte marrëdhënie intime me bashkëshorten e Erjon Alibeajt.
Vetë bashkëpunëtori i drejtësisë, Erjon Alibeaj, dhe avokati i tij e cilësuan këtë deklarim si trillim dhe u kërkuan gazetarëve të pranishëm në sallë të tregohen të kujdesshëm me informacionet që përcjellin.
Erjon Alibeaj: Doja të sugjeroja që mediat të bëjnë durim, sepse pasi të mbarojë Nuredin Dumani dëshminë e tij, unë do flas për gjithçka. Nga deklarimet e mia, ka për të dëgjuar mediat për të gjithë Suel Çelat. Unë do t’i them të gjitha. Janë thënie shumë të pavërteta dhe trillime, sugjeroj mediat mos të nxitohen derisa të japim dhe ne deklarimet tona.
Xhuljan Hoxha: Pse të dogji ty o Erjon? Unë kam marrë burgim të përjetshëm për fjalët e tua. Kam shumë për të thënë për ty.
Petrit Qoli deklaroi: Kam frikë se do vdes, kam një gjendje në trup. Kam 3 vjet në burg, pa parë mbesat e mia. Unë jam marrëzisht i dashuruar me gruan time, nuk e kam takuar. Do vras veten. Jam shumë keq, kam pirë dy qetësuese dhe nuk më kanë bërë punë. Po shkelni ligjin me këmbë të gjithëve.
