Besimtarët myslimanë pas një muaji agjërimi e sakrificash shpirtërore, festojnë sot festën e Fitër Bajramit.
Në Tiranë besimtarët u mblodhën në “Sheshin Skënderbej” për faljen e madhe në Tiranë. Ceremonia nisi në orën 06:45 me leximin e Kuranit dhe ligjëratën dhe më pas vijoi me faljen e madhe në shesh.
Kreu i Komunitetit Mysliman, Bujar Spahiu mes të tjerash në fjalën e tij uroi të gjithë besimtarët anëmbanë dhe gjithashtu që “Zoti t’u kishte pranuar agjërimin dhe t’i ndihmonte në përballimin e sfidave të jetës”.
“Kjo ditë sot na gjen me zemra të mbushura dhe sakrifica jonë është pranuar. Jetojmë në një epokë ku vlerat e familjes po lëkunden dhe njeriu matet me atë që ka. Kjo ditë është një urë mes asaj që kemi mësuar në Ramazan dhe atë që do të bëjmë pas tij. Bajrami na kujton unitetin, mëshirën dhe drejtësinë, ne jemi një komb”, tha kreu i KMSH mes të tjerash në fjalën e tij me rastin e kësaj feste, para mijëra besimtarëve.
Ndërsa po ashtu kjo festë e shenjtë është festuar në gjithë Shqipërinë.
Vlorë, ceremonia e Fitër Bajramit u zhvillua në Pallatin e Sportit
Në Vlorë, besimtarët, të shumtë në numër, u mblodhën për të kryer faljen e kësaj feste të bekuar. Për shkak të mbylljes të Xhamisë së Plumbit për shkak të dëmtimeve që pësoi nga përmbytja e fundit ceremonia u zhvillua në Pallatin e Sportit, i cili u mbush plot me besimtarë të devotshëm.
Ceremonia nisi me leximin e Kuranit, duke sjellë qetësi dhe reflektim te të pranishmit. Më pas, besimtarët u bashkuan në faljen e namazit, duke e kthyer këtë moment në një shenjë bashkimi dhe devotshmërie. Myftiu i Vlorës, Ardit Hoxhlleku, mbajti një fjalim duke falënderuar komunitetin për përkushtimin e tyre në këtë muaj të shenjtë. Ai përcolli mesazhin e paqes dhe harmonisë, duke theksuar rëndësinë e vlerave familjare dhe solidaritetit.
Pas faljes, besimtarët shkëmbyen përqafime dhe urime të përzemërta, duke e bërë këtë ditë edhe më të veçantë. Në fund, një koncert i organizuar nga Myftinia solli gëzim për të vegjlit, duke e përmbyllur këtë festë me hare dhe shpresë për ditë më të mira.
Fitër Bajramit në Fier, myftiu lutet për më shumë respekt e dashuri
Po ashtu edhe besimtarët muslimanë fierakë kanë falur mëngjesin e sotëm namazin e Fiter Bajramit në xhaminë e qytetit pas një muaji agjërimi.
Besimtarët e të gjitha grupmoshave janë falur për mirësi shëndet dhe fat në familjet e tyre.
Ceremonisë së faljes i parapriu me fjalën e tij myftiu i Fierit Mikel Hazizolli, i cili përcolli mesazhin për më shumë respekt e dashuri ndaj njëri – tjetrit, dhe për më tepër besim duke e konsideruar njeriun si pasurinë më të madhe që ka krijuar Zoti.
Ceremonia u mbyll me lutje të përbashkët ku besimtarët e shumtë kanë shkëmbyer me njëri- tjetrin mesazhin e paqes dhe begatisë në cdo familje.
Besimtarët myslimanë falen Namazin në sheshin qendror të Lushnjes
Besimtarët myslimanë kanë falur Namazin e Fiter Bajramit pas muajit të agjërimit.
Në Lushnje, qindra besimtarë kanë falur Namazin në sheshin qëndror të qytetit.
Faljen e namazit e drejtoi imami i xhamisë Lushnje Alban Puka.
Pas faljes, Myftiu i Lushnjes Gramoz Blliku mbajti fjalën e rastit si dhe uroi besimtarët për begati paqe e lumturi në familjet e tyre dhe Zoti jua pranoftë lutjet.
Shkodër, myftiu i qytetit: Të parandalojmë të keqen në familjet dhe shoqëritë tona
Mesazhin e tij në festën e Fitër Bajramit, myftiu i Shkodrës e kishte për të rinjtë. Imam Muhamed Sytari kërkoi pendim të sinqertë tek Zoti. Ai tha se mëshira e Zotit është më e madhe se gjynahet tona. Myftiu i Shkodrës theksoi se duhet të parandalojmë të keqen në familjet dhe shoqëritë tona, si edhe kërkoi distancim nga haramet.
Një mesazh e kishte edhe për Gazën, ku tha se zullumi nuk e ka jetën e gjatë, pasi Zoti sheh gjithçka.
Falja e namazit të Fitër Bajramit u organizua në xhamitë e qytetit të Shkodrës.
Besimtarët mysliman në Kukës falen në shi
Qindra besimtarët mysliman në Kukës falën namazin e Fitër Bajramit në xhaminë kryesore të qytetit.
Pas faljes së Fitër Bajramit besimtarët përcollën urimet më të mira për këtë ditë të shënuar të besimit islam, duke kërkuar edhe zgjerimin e xhamisë.Ndërsa myftiu i qytetit Emirjon Vathaj tha se kjo ditë shënon një nga ditët më të bukura të kalendarit islam.
Bashkia Kukës ka numrin më të madhë të besimtarëve mysliman në vend, ku 97% e popullësisë i takojnë besimit islam.
