1644 njerëz raportohet se kanë të vdekur në Mianmar dhe mijëra të tjerë janë plagosur, pas një tërmeti me magnitudë 7.7, që tronditi dhe vendet fqinje, e qëshkaktoi dëme të mëdha.
“Numri i të vdekurve në Mianmar është rritur në 1,644, ndërsa numri i të plagosurve ka shkuar në 3,408, dhe 139 të tjerë janë të zhdukur”, ka njoftuar ushtria e vendit.
Qindra njerëz besohet të jenë të bllokuar nën rrënojat e ndërtesave të shembura, përfshirë të paktën 50 punëtorë ndërtimi të cilët janë të zhdukur pasi një ndërtesë e lartë u rrafshua nga tërmeti në Bangkok.
Ndërkohë, më shumë se 90 njerëz besohet se janë bllokuar në rrënojat e një blloku apartamentesh në Mandalay , Myanmar, tha një zyrtar i Kryqit të Kuq për AFP.
AFP thotë se një grua 30-vjeçare është nxjerrë e gjallë nga rrënojat e kësaj ndërtese, pasi mbeti e bllokuar për rreth 30 orë.
Ajo u transportua me barelë, u përqafua me bashkëshortin e saj dhe më pas u dërgua në spital.
“Në fillim nuk e mendoja se ajo do të ishte gjallë”, tha burri i saj për AFP ndërsa priste gjatë shpëtimit. “Jam shumë i lumtur që kam dëgjuar një lajm të mirë”.
