Një diamant i rrallë blu që ka kaluar 300 vite në shtëpitë mbretërore të Europës, është shitur në një ankand në Gjenevë për 6.7 milionë dollarë.
The Farnese Blue i ishte dhënë si dhuratë martese Elisabeth Farnese, vajzës së dukës së parmës, kur ajo u martua me Filipin e V të Spanjës në 1715. Ai u përcoll më pas nga gjenerata në gjeneratë duke u zhvendosur nga Spanja në Francë, më pas në Itali dhe Austri.
Diamanti 6.1 karatësh vjen nga miniera e famshme e Golcondës në indi. Ai u shit pas vetëm katër minutash në ankandin e “Sotheby’s” duke kapërcyer menjëherë parashikimet e ekspertëve, nga 3.5 në 5 milionë dollarë.
“Ne prisnim një rezultat të mirë por filluam nga 3.4 milionë dollarë dhe përfunduam me 6.7 milionë, ndaj i kapërcyem pritshmëritë”, thanë specialistët e “Sotheby’s”.
Sipas faqes së internetit të shtëpisë së ankandeve, diamanti në formë dardhe, dikur ishte pjesë e një kurore të mbretëreshës fatkeqe të Francës Marie Antoinette. Identiteti i pronarit të fundit ndërkohë nuk është bërë i ditur.
