Sipas ligjit për blerjet publike me vlerë të vogël deri në 120 mijë lekë, kontrata duhet të kalonte në një proces vlerësimi nga komisioni i ofertave.
Emisioni “Fiks Fare” ka zbuluar një skandal në Qendrën Shëndetësore të Vorës, ku drejtoresha e institucionit ka përzgjedhur vetë kompaninë fituese të tenderit për lidhjen e internetit, duke shmangur komisionin e vlerësimit të ofertave dhe duke shkelur hapur procedurat ligjore.
Por në këtë rast, interneti është lidhur pa asnjë vlerësim tregu dhe pa miratimin e komisionit, ndërsa anëtarëve të tij u është kërkuar që të firmosin formalisht dokumentet. Duke bërë të duket se gjithçka është bërë sipas rregullave.
Nga materialet e siguruar nga Fiks Fare, juristja dhe ekonomistja e qendrës shëndetësore refuzojnë të firmosin, duke pohuar se nuk është bërë asnjë vlerësim i tregut dhe as nuk janë marrë oferta nga kompani të tjera. Në këtë debat, drejtoresha pranon se interneti është lidhur prej tre muajsh, ndërsa tani, në mars 2025, kërkon që komisioni të firmosë kontratën për ta legjitimuar.
Ekonomistja thotë se është nën presion nga drejtoresha prej pesë vitesh për tenderat dhe procedurat e blerjeve, por nuk ka çfarë të bëjë. Po ashtu, punonjësit e institucionit përmendin edhe një tjetër rast, atë të blerjes së barnave, ku drejtoresha ka vendosur fituesin por përgjegjësinë ia ka hedhur komisionit “Përgjegjës jeni ju!”
Gazetarët e Fiks Fare shkuan në Qendrën Shëndetësore të Vorës për të pyetur drejtoreshën mbi këtë skandal, por u tha se ajo kishte marrë leje dhe do të kthehej në punë më 1 prill. Fiksi e kontaktoi në telefon. Ajo fillimisht mohoi se qendra kishte internet, por më pas ndryshoi qëndrim, duke kërkuar që t’i dërgohej një kërkesë me shkrim.
Infermierja e drejtoreshës dhe mjekët e tjerë të qendrës konfirmuan se interneti ishte i lidhur dhe funksional. Për më tepër, gazetarët kontaktuan pronarin e kompanisë së shpallur fituese, i cili pranoi se ka lidhur internetin në qendër disa muaj më parë për një vlerë prej 120 mijë lekësh. Ai cilësoi se kontrata nuk është firmosur.
Pra operatori u zgjodh nga drejtoresha dhe tani ushtron presion mbi stafin për të firmosur procedurën e cila duhet të ishte bërë përpara se të bëhej lidhja dhe gjithashtu të ishte publikuar në regjistrin e parashikimeve, hapësirë e dedikuar për procedurat me vlerë të vogël në faqen e Agjencisë së Prokurimit Publik.
/Emisioni “Fiks Fare”
