Administrata Trump po planifikon të importojë miliona vezë nga Turqia dhe Koreja e Jugut dhe është në bisedime me vendet e tjera, në një “operacion” për të ulur çmimet e larta të të gjitha kohërave për këtë produkt për konsumatorin amerikan.
“Ne po flasim për qindra miliona vezë për një afat të shkurtër,” u tha gazetarëve në Shtëpinë e Bardhë Sekretarja e Bujqësisë Brooke Rollins, e cila shpalosi para tyre dhe planin 1 miliard dollarë për të luftuar një epidemi të gripit të shpendëve që ka detyruar fermerët amerikanë të zhdukin dhjetëra miliona pula.
Pavarësisht premtimit të fushatës së Presidentit Trump për të ulur çmimet, kostoja e vezëve është rritur më shumë se 65% gjatë vitit të kaluar dhe parashikohet të rritet me 41% në vitin 2025.
Rollins tha se departamenti i saj ishte gjithashtu në bisedime me vende të tjera për të siguruar furnizime me vezë, por nuk specifikoi se cilat rajone.
Shoqatat polake dhe lituaneze të shpendëve thanë të premten se ishin kontaktuar nga ambasadat amerikane në lidhje me eksportet e mundshme të vezëve.
Në shkurt, Departamenti Amerikan i Bujqësisë zbuloi një plan prej 1 miliard dollarësh, me pesë pika për të trajtuar çmimin e vezëve, me një buxhet prej 500 milionë dollarësh për masat e biosigurisë, afërsisht 100 milionë dollarë për kërkimin dhe zhvillimin e vaksinave dhe 400 milionë dollarë për programet e ndihmës financiare të fermerëve.
Administrata Trump tha se do t’u ofrojë fermave komerciale të vezëve praktikat më të mira dhe shërbime këshillimi falas dhe do të paguajë deri në 75% të kostove për të ndihmuar në parandalimin e përhapjes së gripit të shpendëve.
