Prokuroria e Fierit ka përfunduar hetimet paraprake dhe ka dërguar për gjykim 47-vjeçarin Ilir Nukaj nga fshati Povelçë, i cili akuzohet për dhunimin e çiftit të bashkëshortëve Namik dhe A. Rustemi, ngjarje kjo e ndodhur pasditen e 12 Tetorit të vitit të kaluar.
Ilir Nukaj është marrë i pandehur për veprën penale “Plagosje e rëndë me dashje” me pasojë vdekjen, në dëm të viktimës Namik Rustemi dhe për veprën penale “Plagosje e lehtë me dashje” në dëm të A. Rustemi.
“Nga hetimet e kryera në kuadër të procedimin penal nr.1591, të vitit 2024, rezultoi se më datë 12.10.2024, në fshatin “Hoxhare e Re” (Povelçë), Njësia Administrative Dërmenas, bashkia Fier, shtetasi I.N., për motive të dobta ka ushtruar dhunë fizike ndaj të moshuarve N.R. dhe A.R. (bashkëshortë), ku si pasojë e dhunës së ushtruar ka gjetur vdekjen njëri prej tyre, shtetasi N.R.” – njofton Prokuroria.
80-vjeçari Nami Rustemi ndërroi jetë pas 6 ditësh në spital, teksa prej ditës së ngjarjes ndodhej në intubim dhe fatkeqësisht nuk ka arritur dot t’u mbijetojë plagëve të marra.
Viktima ishte pronar i një dyqani të vogël në fshat dhe dhunuesi kishte shkuar për t’i kërkuar një shihe birrë, por i moshuari nuk i dha, duke qenë se ai njihej si person problematik.
Pas këtij momenti, Ilir Nukaj e ka dhunuar brutalisht të moshuarin me grushte dhe shkelma në kokë dhe trup, teksa në momentin e ngjarjes ai ishte në gjendje të dehur. Edhe bashkëshortja e viktimës, 77-vjeçarja A. Rustemi u dhunua nga 47-vjeçari duke marrë lëndime, por pa rrezik jete.
Ngjarja ndodhi në ambientet e jashtme të dyqanit të Namik Rustemit. Pas dhunës, Ilir Nukaj u arrestua nga policia dhe ndodhet në paraburgim.
Vlen të theksohet fakti se Ilir Nukaj ka qenë i dënuar me 10 vite burg për një tentativë vrasjeje të ndodhur 12 vite më parë në këtë zonë, teksa plagosi rëndë me thikë një pronar lokali, të cilin e kishte vjedhur më parë dhe i dëmtuari e kishte denoncuar. Gjithashtu OFL e kishte hetuar dhe verifikuar për pasurinë në vitin 2020.
