Policia e Shtetit ka njoftuar ekstradimin drejt vendit tonë të dy personave të shpallur në kërkim nga drejtësia shqiptare, teksa njëri është i akuzuar për tentativë për vrasje, ndërsa tjetri për krijimin e një skeme mashtrimi me qëllim përfitimin e rimbursimit të TVSH-së.
Më konkretisht, është ekstraduar nga Athina 40-vjeçari Bashkim Koçi nga Burreli. Ai akuzohet për plagosjen me pistoletë të Akil Dedja, ngjarje kjo e ndodhur më 1 Qershor të vitit 2023 në Mat. Ata kanë qenë duke konsumuar alkool në lokal dhe pasi kanë dalë nga lokali, janë konfliktuar për motive të dobëta.
“Gjykata e Shkallës së Parë e Juridiksionit të Përgjithshëm Dibër, me vendimin e datës 07.06.2023, i ka caktuar këtij shtetasi, masën e sigurisë “Arrest në burg”, për veprat penale “Vrasja me dashje”, mbetur në tentativë dhe “Mbajtja pa leje dhe prodhimi i armëve shpërthyese dhe municionit, pasi dyshohet se më datë 01.06.2023, në lagjen “Partizani”, Burrel, gjatë një konflikti për motive të dobëta me shtetasin A. D., ka tentuar ta vrasë atë, me armë zjarri pistoletë. Nga të shtënat, shtetasi A. D. është dëmtuar rëndë” – njofton Policia.
Ndërkohë, nga Italia është ekstraduar shtetasi italian Salvatore Cascino, 53 vjeç. Ai ishte arrestuar në shtetin fqinj rreth 1 vit më parë, gjatë operacionit “Filiali”, pasi ishte shpallur në kërkim ndërkombëtar në kuadër të operacionit “Skema”, i zhvilluar në Shqipëri, në vitin 2023, në bashkëpunim me autoritetet italiane.
“Salvatore Cascino akuzohet se në bashkëpunim me 2 shtetas të tjerë italianë dhe me 2 shtetas shqiptarë (të arrestuar), kanë krijuar një sistem kompanish fiktive për qarkullimin e shumave monetare. Nëpërmjet kontratave fiktive të konsulencës, këto kompani, gjatë periudhës dhjetor 2019 – mars 2020, kanë krijuar një teprice kreditore tek një shoqëri me administrator njërin nga shtetasit italianë, për të cilën, në mënyrë abuzive, është kërkuar rimbursim i TVSH-së. Nëpërmjet kësaj skeme, në vitin 2022, është përfituar si rimbursim i TVSH-së, shuma 20 765 411 lekë.” – njofton Policia.
