Kreu i Bashkisë së Matit, Agron Malaj dha ditën e sotme dorëheqjen nga posti i kryebashkiakut, pasi pritet të jetë kandidat i Partisë Socialiste në listën e Qarkut të Dibrës.
Agron Malaj ka qenë komandant seksioni i Njësisë Speciale të Gardës së Republikës në protestën e 21 Janarit. Ai është një prej 10 oficerëve të “grupit të zjarrit”, të cilët qëlluan mbi protestuesit në tubimin ku mbetën katër qytetarë të vrarë.
Por, edhe pse “21 Janarin” e përdori për të ardhur në pushtet, Edi Rama ish-gardistin Agron Malaj e ka shpërblyer prej vitesh.
Fillimisht Rama atë e emëroi drejtor të OSHEE-së për rrethin e Matit, teksa në fushatën e zgjedhjeve lokale të 23 qershorit 2015, Agron Malaj doli në krah të Edi Ramës për të kërkuar votat për kandidaten socialiste.
Ndërkohë, në vitin 2019, kur opozita nuk mori pjesë në zgjedhjet lokale, Agron Malaj kandidoi për Bashkinë e Matit nën logon e PS-së dhe prej 6 vitesh mbante postin e kryebashkiakut të dhënë nga Rama. Tashmë, duket se ky i fundit po e shpërblen sërish Malajn duke e bërë deputet.
Duket se ky veprim nga ana e Ramës, nuk i ka pëlqyer Mark Nikës, xhaxhait të Aleks Nikës, një prej vitkimave të 21 Janarit. Ai i ka dërguar një mesazh gazetarit Sokol Balla ku i kërkonte që ta pyesë në emisionin e tij, drejtuesin e PS-së për Dibrën, Blendi Klosi, nëse Agron Malaj do kandidojë për deputet të Partisë Socialiste më 11 maj. Ai thekson se nëse kjo gjë është e vërtetë, atëherë Partia Socialiste ka gabuar me këtë zgjedhje.
Mesazhi:
“Kam një masazh nga Mark Nika, që është xhaxhi i Aleks Nikës, vrarë më 21 janar 2011: Mirëmbrëma Sokol, mundësisht nëse mund ta pyesni z. Klosi se a është e vërtetë se Agron Malaj, ish-komandanti i “Grupit të Zjarrit” më 21 janar, a është kandidat për deputet i Partisë Socialiste, nëse po, thuajini se keni gabuar”
Kujtojmë se Agron Malaj ka dëshmuar edhe në SPAK për mbi 1 orë më 4 Tetor të vitit të kaluar. Për Agron Malaj dhe vëllain e tij Fatos Malaj, ka një kallëzim në SPAK nga Edmond Miza, banor i fshatit Madhesh i Bashkisë së Matit.
Ai pretendon se kryebashkiaku i Matit ka favorizuar vëllain e tij për ndërtimin e një HEC-i, duke shpërdoruar detyrën dhe duke favorizuar kundër ligjit familjarët e tij. Edmond Miza pretendon se atij dhe disa banorëve të tjerë, u është falsifikuar firma.
Gjithashtu, Agron Malaj është përmendur edhe për tendera në konflikt interesi në kompaninë e vëllait të tij Fatos Malaj, ndërkohë që dyshohet për përfshirje në skemën e kompanisë “5D Konstruksion” në Bashkinë e Tiranës.
Fatos Malaj është pronar me 60 % të aksioneve tek hoteli luksoz “La Brisa” në Dhërmi, teksa 40% të aksioneve zotërohen nga Elvin Tivari, ish-drejtori i Prokurimeve në UKT, gjatë kohës që drejtohej nga Redi Molla. Gjithashtu, ata kanë marrë dhe një tjetër leje ndërtimi për ‘La Brisa 2’.
