Ka përfunduar pas afro 6 orësh mbledhja e kryeministrit dhe kryesocialistit Edi Rama me ministrat, kryesinë e Grupit Parlamentar dhe drejtuesit politikë të PS.
Mbledhja e nisur në Pallatin e Brigadave rreth orës 14:00 të pasdites së kësaj të premte ka përfunduar vetëm pak minuta më parë. Ndërkohë, ashtu sikurse e kemi njoftuar dhe më herët socialistët do të rikthehen sërish ditën e nesërme për të vijuar me diskutimet.
Burime për mediat bëjnë me dije se në mbledhjen e kësaj të premte u diskutua për programin elektoral si dhe për qasjen që socialistët do të ndjekin në takimet publike me qytetarët.
Në fokus të mbledhjes ka qenë edhe vota e diasporës, e cila si për socialistët, po ashtu dhe për demokratët është një ndër sfidat kryesore për këto zgjedhje parlamentare.
Referuar burimeve jozyrtare mësohet se përgjatë këtyre orëve, kreu i qeverisë ka kaluar në sitë angazhimin e gjithsecilit duke bërë një vlerësim të punës së deritanishme.
