Deri në fund të marsit Milani duhet të gjejë një drejtor të ri sportiv dhe mediet tej Adriatikut bëjnë me dije se Igli Tare është një kandidaturë e fortë për këtë post të rëndësishëm, në një prej klubeve më të titulluara në botë.
Sipas “Tuttosport” Milani po kërkon një profil që njeh mirë ambientin e futbollit italian si dhe të operojë në një ekip, i cili nuk “lundron” në ujëra të qeta sa i përket aspektit ekonomik.
Për të përditshmen torineze, Igli Tare që të emërohet në këtë post te Milani duhet të mposhtë kandidatura të forta siç janë ato të Fabio Paraticcit, Andrea Bertës dhe Fransua Modesto.
Për “Tuttosport” në këtë garë Paraticci është në avantazh. Në qershor 52-vjeçari mund të rikthehet në botën e futbollit pas dënimit që mori gjatë kohës kur mbulonte këtë rol te Juventusi.
Një tjetër emër i fortë është edhe ai i Andrea Bertës, i cili ka qenë drejtori sportiv i Atletico Madrid. Por Berta ka pak shanse që të pranojë ofertën e Milanit pasi ka marrë një propozim interesant nga PSG-ja.
Kujtojmë se Tare ishte drejtor sportiv te Lazio prej verës 2008 dhe deri në verën e 2023, kur vendosi të largohej pas 15 vitesh.
