Ndërsa presidenti ukrainas, Volodymyr Zelensky po konsideronte nënshkrimin e një marrëveshjeje mineralesh me Shtetet e Bashkuara, Rusia i ka ofruar administratës Trump një marrëveshje për burimet natyrore ruse në Arktik.
Kreu i Fondit të Investimeve Direkte Ruse, Kirill Dmitriev, një nga tre të dërguarit e zgjedhur nga Vladimir Putin për t’u takuar me amerikanët në Riad, tha se Rusia beson se kompanitë amerikane të naftës mund të kthehen në vend.
Përveç kësaj, sipas Dimitriev, kompanitë amerikane janë të interesuara për projekte të përbashkëta në Arktik.
“Ne besojmë se në një moment ata do të kthehen, sepse pse do të refuzonin mundësinë për të hyrë në burimet natyrore që Rusia u dha atyre?”, tha Dmitriev. Ai tha gjithashtu se të dy palët “duhet të bëjnë projekte të përbashkëta“, si në Arktik, shkruan Moscow Times.
Sipas tij, kompanitë amerikane humbën 300 miliardë dollarë nga sanksionet kundër Rusisë. Para pushtimit të Ukrainës, vetëm një kompani e madhe amerikane ishte e përfshirë në prodhimin e naftës në Rusi.
Ky ishte Exxon Mobil, i cili zotëron 30% të projektit Sakhalin-1. Pas vendosjes së sanksioneve, kompania njoftoi tërheqjen e saj nga projekti, por nuk ishte e mundur të shiteshin aksionet. Fillimisht supozohej se kjo do të ndodhte në vitin 2023, por Kremlini e zgjati dy herë afatin, i cili tani skadon në fund të vitit 2026.
