Ditën e djeshme në një kopsht në qytetin e Laçit u regjistrua një rast i prekur me dizenteri, i cili ngriti shqetësime në autoritetet lokale. Fëmija kishte shfaqur temperaturë për disa ditë dhe më pas u dërgua në spitalin e QSUT, ku pas analizave ka rezultuar i prekur nga dizenteria.
Lidhur me këtë rast, mjeku Ilir Alimehmeti i ftuar nË “Aldo Morning Show” tha se nuk ka vend për panik. Sipas tij është një sëmundje infektive e cila është krejtësisht e kontrollueshme dhe e menaxhueshme.
Mjeku sqaroi se kjo sëmundje mund të shkaktohet nga bakteret ose parazitët që gjenden në ujë apo ushqim. Prandaj sugjerohet që të tregohet një kujdes i shtuar sa i përket higjienës.
“Dizenteritë janë një lloj sëmundje e zorrëve të cilat shkaktohen nga baktere ose parazitë. Me pak fjalë janë sëmundje infektive. Ndryshimi me diarrenë është se kjo shoqërohet dhe me gjak. Patjetër që kjo e bën shqetësuese, pamja e gjakut e kështu me radhë. Janë sëmundje që ne i njohim shumë mirë dhe që shkaktohen nga baktere dhe parazitë të ndryshëm.
Por, nga ajo që vjen është më e kontrollueshme, pra dimë se si ta trajtojmë, por dimë edhe se si ta parandalojmë. Për dizenterinë higjiena është kyçe. Që do të thotë që vjen nga pisllëku dhe përgjithësisht vjen nga goja. Uji mund të mos ketë qenë i pastër, ushqimi po ashtu apo edhe duart e palara. Në këto raste dezinfektimi është shumë i rëndësishëm sepse po flasim për higjienë e sidomos kur kemi të bëjmë me ambiente komunitare. Duhet parë nëse do të kemi raste të tjera apo jo. Deri tani nuk kemi dëgjuar që të raportohet diçka e tillë, por presim nëse do të ketë, për të kuptuar se cila është vatra, familja, çerdhja apo ndonjë ambient tjetër. Burimi kryesor është ushqimi, uji, lodrat e të tjerë, por është diçka që kontrollohet. Me rëndësi ka që të kuptohet se kush është burimi”, tha mjeku.
