Nga Boldnews.al
Një rus dhe një bullgare, të lidhur ngushtësisht me pronarin e Spitalit Amerikan, Klodian Allajbeu, kanë marrë lejen e kryeministrit Edi Rama për ndërtimin e një resorti turistik në zonën bregdetare të Zvërnecit, në Vlorë.
Në 28 Janar 2025, Këshilli i Rregullimit të Territorit (KRRT), nën drejtimin e Ramës, ka miratuar disa vendime, ndër të cilët “Resort turistik në Gadishullin e Zvërnecit”, Blloku Rezidencial F1V2, F1V3, F1R6”, me vendndodhje në Pishë Poro-Nartë, Bashkia Vlorë”.
Leja e ndërtimit është lëshuar në favor të kompanisë “Zvërneci South Adriatic Development”. Kompania është krijuar në Gusht të vitit 2024 dhe qëllimi i saj duket se ka qenë pikërisht projekti turistik në Zvërnec.
Shoqëria “Zvërneci South Adriatic Development” zotërohet nga një kompani off-shore me seli në Amsterdam, “Universal Properties Projects BV”.
Sipas të dhënave të Regjistrit të Pronarëve Përfitues, kompania mëmë zotërohet me nga 50 përqind të aksioneve nga Nikita Maximovich Vinogradov, një 33-vjeçar rus, si edhe nga 35-vjeçarja bullgare, Zoya Georgieva Gyurova.
Lidhjet e këtyre dy emrave me Klodian Allajbeun e Spitalit Amerikan janë të shumëfishta.
Rusi Vinogradov
Në vitin 2022, shoqëria “Media A.B.C Holding B.V.”, me seli në Amsterdam dhe me aksionerë Klodian e Iris Allajbeu, si edhe A.A dhe I.A, blen zyrtarisht aksionet e “A.B.C. Management”, kompania zotëruese e televizionit “ABC News” në Tiranë.
Disa kohë më vonë, kompania hollandeze e familjes Allajbeu i shet aksionet e televizionit tek “A.B.C Management”.
Autorizimi për këtë transaksion është bërë nga anëtari i vetëm i Bordit Dutch Trust Management B.V”, përfaqësuar nga shtetasi rus, Nikita Maximovich Vinogradov.
Po ashtu, në tetor të vitit 2014, shoqëria hollandeze “American Hospital bv” në pronësi fundore të Nikita Maxhimovish Vinigradov dhe Zoya Georgieva Gyurova, ka blerë aksionet e “Balkan Aliance Healthcare” të Allajbeut. Pas këtij transaksioni, sipërmarrësi rus dhe kolegia e tij bullgare bëhen aksionerët të Spitalit Amerikan.
Vinogradov, Gyurova dhe Allajbeu rezultojnë gjithashtu pronarë fundorë në “Resortin Equos”, në periferi të Tiranës.
Bullgarja Gyurova
Sipërmarrësja bullgare, Zoya Georgieva Gyurova, rezulton prej vitesh përfaqësuese e shoqërisë “Arimo BV”. Kompania “Arimo” zotëron shumicën aksione në shoqërinë koncesionare të Hemodializës, ku përfituesi kryesor nga shërbimi shëndetësor është Spitali Amerikan, në pronësi prej vitesh të Klodian Allajbeut.
Gyurova dhe Vinogradov zotërojnë shumicën e aksioneve në shoqërinë shqiptare “Cambridge Clinical Laboratories”, ku ortake është edhe mjekja A. Priftaj, e cila është gjithashtu e punësuar pranë Spitalit Amerikan, në Tiranë.
Opozita “fali” Allajbeun
“Boldnews.al” ka raportuar më herët për lidhjet e interesave të biznesmenit Klodian Allajbeu me kontratën koncesionare të shërbimit të Hemodializës.
Vitin e kaluar, opozita parlamentare kërkoi një Komision Hetimor për kontrollin e koncesioneve në Shëndetësi.
Por, pas një “akordi” me maxhorancës, në punimet e këtij Komisioni u përjashtua verifikimi mbi procedurat koncesionare dhe zbatimin e kontratës së Hemodializës.
Mbi kontratën me kosto koncesionare 80 milioë dollarë për shërbimin e Hemodializës u ngritën dyshime që në krye të herës se pas saj gjendeshin interesat e Allajbeut, i cili zotëron “Spitalin Amerikan” dhe “Spitalin Hygeia”.
Kontrata u fitua nga një shoqëri anonime, me seli në Berat, “Evita”, pas të cilës gjendeshin emra që kishin lidhje të afërta me Klodian Allajbeun. Lidhjet e tij u bënë më të dukshme, kur, menjëherë pas fitimit të kontratës, “Evita” u bashkua me “Spitalin Amerikan”, për të krijuar kompaninë “DiaVita”, e cila do të zbatonte koncesionin.
Në vijim, kompania koncesionare ka ndryshuar herë pas here pronarë. Aktualisht është në pronësi të një konsorciumi suedez, “Diaverum International”.
Megjithë ndryshimet e pronësisë, përfituesi kryesor i parave të Buxhetit të Shtetit për Hemodializën vijon të jetë sërish Allajbeu, me Spitalin Amerikan.
Kontrolli i Lartë i Shtetit, në raportet e auditit për zbatimin e kontratës koncesionare të Hemodializës, ka konstatuar problematika të mprehta, të cilat lidhen drejtëpërdrejtë me përfitime nga grupi financiar i Allajbeut.
Në Shkurt 2022, “Boldnews.al” ka raportuar të dhëna mbi raportin e KLSH-së, në bazë të të cilit rezultonte se kompania koncesionare “Diavita”, ku bënte pjesë edhe Allajbeu, ka marrë mbi 1 milionë euro përfitime pa kryer asnjë shërbim.
KLSH zbuloi se kompania koncensionare “DiaVita” ka marrë pagesa nga Fondi i Sigurimit të Detyrueshëm të Kujdesit Shëndetësor (FSKDSH) në vlerë mbi 115 milionë lekë të reja për shërbimet e kryera gjatë periudhës Nëntor 2016-Prill 2017 në spitalet rajonale të Elbasanit dhe Korçës.
