Kryeministri Edi Rama nuk e ka zgjatur shumë reagimin, pas qëndrimit që mbajti ambasadori Amerikan në Tiranë Donald Lu, lidhur me dënimin e vëllait të ministrit të Brendshëm Fatmir Xhafaj. Rama u shpreh në Parlament se nëse do kishte një problem të vërtetë në lidhje Fatmir Xhafajn, atëherë do ishte i pari ambasadori amerikan në Tiranë Donald Lu që do të reagonte. “Nëse do të kishte diçka të vërtetë për Fatmir Xhafën, do të kishte folur miku ynë i shtrenjtë dhe i pranishëm në mjedisin tonë, ambasadori i SHBA-së Donald Lu. Do të kishte një deklaratë nga BE, por nuk ka”, u shpreh Edi Rama dy ditë më parë në Kuvend.
Pikërisht ky “përdorim i paautorizuar” i emrit që Rama bëri për Lu, solli reagimin e këtij të fundit ku u shpreh se: “Edi Rama të flasë në emër të tij dhe ne do të flasim në emrin tonë… SHBA po shqyrton akuzat për vëllain e Fatmir Xhafajt…” Nuk kaloi pak minuta dhe kryeministri Rama, pa u menduar gjatë, erdhi me një kundër-reagim. “Patjetër që unë flas për veten time dhe miku ynë Lu flet për veten e vet. Dhe krejt normalisht, është puna ime të them atë që mendoj kur flas lidhur me të, siç është puna e tij të thotë atë që mendon kur pyetet lidhur mua”-shkruan Rama në Facebook. A ka nisur një “ftohje” Rama-Lu?
