Aksi rrugor nga tuneli i ujit të ftohtë deri në Orikum, është shndërruar në makth për shoferët dhe bizneset e kësaj zone. I nisur për rikonstruksion në vitin 2022 dhe me afat përfundimi prillin e vitit 2024, kjo rrugë jo vetëm që nuk përfundoi, por sot është shndërruar në problem për lëvizjen e mjeteve, për shkak të dëmtimit dhe gropave të hapura në trasenë e rrugës.
Rruga e nisur për rikonstruksion disa vite më parë, do të duhet të përfundonte në muajin prill të vitit 2024. Jo vetëm në muajin prill të vitit të kaluar, por as për këtë sezon turistik, ky aks rrugor duket se nuk do të përfundojë, duke u kthyer në makth për përdoruesit e rrugës.
Nisja e punimeve për projektin Lungomare 3, ka sjellë pasoja edhe për bizneset e sipërmarrës, që operojnë në këtë zonë.
Për herë të parë, projekti i shëtitores Bregdetare nga Tuneli në drejtim të Radhimës është prezantuar në vitin 2021, ndërsa punimet nisën në dhjetor 2022 nga Fondi Shqiptar i Zhvillimit me financues: Fondi Kuvajtian me 40.8 milionë USD, Fondi Saudit me 30 milionë USD dhe Qeveria Shqiptare me 11 milionë USD./ Syri TV
