Është rënduar bilanci i tragjedisë së ndodhur në resortin e skive Kartalkaya në provincën Bolu të Turqisë, që u përfshi nga flakët e zjarrit në orët e para të mëngjesit të sotëm.
Ministri i Brendshëm turk Ali Yerlikaya ka bërë me dije së fundmi se numri i personave që kanë humbur jetën në fatkeqësinë e zjarrit është rritur në 66 viktima dhe numri i të plagosurve u rrit në 51.
Nga ana tjetër, ministri tukr i Drejtësisë Yılmaz Tunç bëri të ditur se për fatkeqësinë e zjarrit u caktuan 6 kryeprokurorë publikë dhe u formua një komision ekspertësh prej 5 personash.
Zjarri shpërtheu rreth orës 03:30 të mëngjesit në një hotel në Kartalkaya, një nga vendpushimet kryesore të skive në Turqi me një lartësi prej 2200 metrash. Fillimisht flakën nisën në restorantin e hotelit dhe më pas u përhapën në të gjithë ndërtesën 12-katëshe për shkak të izolimit të jashtëm prej druri.
Ngjarja ndodhi në një kohë kur shumica e pushuesve ishin në gjumë, gjë që e vështirësoi edhe më shumë situatën. Videot e filmuara nga vetë turistët gjatë aksionit të shpëtimit, kanë kapur momentet teksa vizitorët lidhnin çarçafë për t’u zbritur nga dritaret, ndërsa të tjerët bërtisnin për ndihmë. Dy nga viktimat sipas autoriteteve, thuhet se u vranë pasi u hodhën nga ndërtesa në panik.
Në hotel po qëndronin 237 persona dhe frekuentimi ishte rreth 80-90 %, për shkak edhe të sezonit dimëror.
Mediat turke raportojnë se ekipet e zjarrfikësve mbërritën në vendin e ngjarje rreth 40-45 minuta pasi kishte nisur zjarri dhe ndërhynë për vënien nën kontroll të flakëve.
