Achraf Hakimi mund të rikthehet në Madrid në merkaton e verës, falë kërkesës së Kylian Mbappe. Mediat spanjolle raportojnë se sulmuesi francez i ka kërkuar presidentit Florentino Perez të sjellë në Madrid mbrojtësin maroken, me të cilin ka një marrëdhënie shumë të ngushtë që nga koha kur luanin të dy te PSG-ja.
Kontrata e Hakimi skadon në verën e vitit 2026 dhe sigurisht që Perez nuk do e ketë të lehtë të bindë drejtuesit e PSG-së të lënë të lirë një nga lojtarët e tyre kryesor, por një ofertë e mirë ekonomike mund t’i bëjë francezët të ndryshojnë mendje. Marokeni është një nga mbrojtësit e djathtë më të mirë në botë dhe do të ishte zëvendësuesi ideal i Dani Carvajal.
Hakimi ka qenë pjesë e “Los Blancos” për 3 sezone, por nuk ka arritur dot të shkëlqejë. Fillimisht u huazua te Dortmund, më pas Reali e shiti për 43 milionë euro tek Inter, dhe zikaltrit pas një sezoni pranuan shitjen e tij te PSG për 68 milionë euro.
