Një ngjarje tragjike është shënuar këtë të enjte në fshatin Tërnovë të Bulqizës ku dy të rinj kishin dalë në mal për gjueti, por përfundoi me vrasjen e njërit prej tyre.
Ngjarja ndodhi rreth orës 12:00 në pyllin e fshatit Tërnovë e Vogël në Bulqizë, ku është plagosur me armë gjahu (çifte), shtetasi Vasil Kamberi, 36 vjeç, i cili si pasojë e plagëve të marra, ka humbur jetën gjatë transportimit me helikopter për në spital.
Nga veprimet e para hetimore, ka rezultuar se autori i dyshuar i ngjarjes është shtetasi Flamur Kamberi, 34 vjeç, i cili është shoqëruar në Komisariatin e Policisë për veprime të mëtejshme.
Të rinjtë janë kushërinj të parë me njëri-tjetrin dhe kishin dalë si zakonisht për gjueti.
Dyshohet që vrasja të jetë aksidentale pasi dy kushërinjtë kanë qenë në pozicione të ndryshme dhe në momentin e të shtënave, dyshohet ta ketë ngatërruar me kafshë të egër.
Çështja tashmë i kaluar prokurorisë së shkallës së parë të Juridiksionit të Përgjithshëm Dibër, ku pritet të zbardhë të vërtetën e ngjarjes së rëndë.
