Palestinezët dolën duke festuar në rrugë pas arritjes së armëpushimit mes Izraelit dhe Hamasit pas më shumë se një viti luftimesh në Rripin e Gazës. Të shumtë ishin ata që brohorisnin dhe duartrokisnin nëpër rrugë ndërda të tjerë u binin borive të makinave në qytetin jugor Khan Younis.
Marrëveshja për armëpushimin do të zbatohet në tre faza. Faza e parë parashikon lirimin e 33 pengjeve dhe të burgosurve dhe do të zgjasë 6 javë. Gjatë kësaj kohe, do të fillojë gjithashtu edhe tërheqja e pjesshme e trupave izraelite nga Gaza dhe rritja e ndihmës humanitare në enklavë.
Detajet e fazës së dytë dhe të tretë, megjithëse kuptohet se janë dakorduar në parim, do të negociohen gjatë fazës së parë. Presidenti amerikan në largim Joe Biden tha se armëpushimi do të vazhdojë edhe nëse negociatat për fazën e dytë dhe të tretë shkojnë përtej gjashtë javëve fillestare të fazës së parë.
Nëse konstatohet se janë plotësuar kushtet për një fazë të dytë, Hamasi do të lirojë të gjithë pengjet e të gjallë, kryesisht ushtarë meshkuj, në këmbim të lirimit të më shumë palestinezëve të mbajtur në burgjet izraelite. Përveç kësaj, sipas dokumentit aktual, Izraeli do të iniconte “tërheqjen e plotë” të tij nga Gaza.
Detajet e një faze të tretë mbeten të paqarta, por nëse plotësohen kushtet e fazës së dytë, në fazën e tretë do të dorëzohen trupat e pengjeve të mbetur në këmbim të një plani rindërtimi tre-pesë-vjeçar që do të kryhet nën mbikëqyrjen ndërkombëtare.
