E nominuara e Presidentit amerikan, Donald Trump, për drejtore të CIA-s është zotuar se nuk do të rikthejë më “teknikat e rënda” të agjencisë së spiunimit.
Gina Haspel, e cila është aktualisht ushtruese e detyrës së udhëheqëses së CIA-s, ka thënë në Senatin Amerikan se nuk do të miratojë asnjë urdhër të cilin e konsideron moralisht të papërshtatshëm.
Megjithatë, ajo nuk i është përgjigjur pyetjes sesi do të vepronte në rast se Trump do ta urdhëronte atë që të merrte në pyetje një të burgosur me teknikën e zhytjes në ujë.
Kjo teknikë është rreptësisht e ndaluar në Shtetet e Bashkuara të Amerikës pasi konsiderohet si mizore dhe brutale, ndonëse ka gjetur përdorim nga CIA. Kjo e fundit e ka shfrytëzuar metodën e zhytjes së kokës në ujë për të marrë në pyetje disa të dyshuar për terrorizëm.
Duke u rikthyer pas në kohë, Trump ka premtuar gjatë fushatës zgjedhore se do ta rikthejë në zbatim këtë teknikë, duke shtuar se metoda “edhe më të këqija do të prezantohen”.
